Панде Лазаревски потврди дека има стан во Домот за постдипломци

Високиот владин функционер потврди дека купил стан што е во завршна фаза на отуѓување во договор со банката

Директорот на Центарот за справување со кризи, Панде Лазаревски, вчера потврди дека користи стан во Домот за постдипломци и докторанди „Атанас Близнаков“ во Скопје. Во писмената реакција до јавноста, испровоцирана од текстот во „Утрински весник“, Лазаревски признава дека користи стан во овој објект, но нагласува дека нема никакви долгови по основа на неплатени станарини.

Лазаревски е најзвучното име меѓу 28 лица што користат станови во оваа зграда, а кои одамна се здобиле со научни звања. Тие по разни основи му должат на Универзитетот „Св. Кирил и Методиј“ 4 милиони денари.

„Да, точно е дека, како и многу други професори (вклучително до скоро и еден проректор), сум корисник на стан во тој објект. Не е точно дека имам долгови за неплатена станарина“, се вели во писмената реакција.

Притоа, Лазаревски објаснува дека уште пред десет години бил понуден модел пред универзитетската управа за стопанисување со објектот и продажба на становите, што „по реални, пазарни цени ќе овозможуваше одржување и континуирано проширување на наменскиот станбен фонд за научно-наставниот кадар на Универзитетот со изградба на нови објекти во согласност со таквиот финансиски модел“.

Според Лазаревски, наводите дека престојува во зградата што беше изградена пред 20 години, како поддршка на постипломците и докторандите за определено време, се „конструирана афера“. „Да, неколку месеци престојувам во објект што се нарекува Дом за постдипломци. Каде престојувам и каде спијам - тоа е моја работа (а, секако дека не можам да престојувам некаде насила)“, вели Лазаревски.

Лазаревски, исто така, пишува дека во меѓувреме има купено и недвижен имот, прецизирајќи дека станува збор за „стан што е во завршна (извршна) фаза на отуѓување во договор со банката поради намирување станбен кредит“. „Точно е дека пролетта минатата година побарав службен стан за привремено користење“, вели Лазаревски, додавајќи дека се' уште не му е одобрен службениот стан од административни причини. Во декември, Лазаревски потпишал договор за купување стан во ��ој треба да се всели за кратко време, односно по завршување на некои формалности и ослободувањето на станот од досегашниот сопственик.

Лазаревски, освен што е висок владин функционер, неформално е дел и од советничкиот тим на претседателот Ѓорге Иванов, а важи за еден од идеолозите на владејачката ВМРО-ДПМНЕ. Во вчерашната реакција, текстот во „Утрински весник“ тој го анализира од аспект на обидите „да се дискредитира една политика и да се дестабилизира и собори конкретна политичка гарнитура“.

Притоа, можеби и не сакајќи, Лазаревски практично го открива моделот според кој владејачката ВМРО-ДПМНЕ се пресметува со своите политички неистомисленици. Сценариото, како што детално и нашироко го опишува Лазаревски, во основа се состои од неколку фази, почнувајќи од наоѓање група незадоволници на кои ќе им се даде можност и конкретни упатства како да настапат во јавност. Во втората фаза, вели Лазаревски, директно се атакува на моралниот интегритет и кредибилитет на лидерот, кој се настојува да се претстави како човек на кого не може да му се верува, односно дека едно мисли, друго зборува, а трето прави. Фазата три, според Лазаревски, е да се излезе во јавност со полувистини и афери, а во следната четврта фаза нападите се насочуваат кон препознатливи, истакнати лица од владејачката гарнитура, при што, како што вели Лазаревски, преку манипулација со полувистини насочени кон морално дискредитирање на челни луѓе од партијата на власт и од владејачката гарнитура, се праќа главната порака до јавноста за тоа какви луѓе ја водат земјата.

Лазаревски, покрај стратегијата, ги објаснува и тактичките потези, при што, како што вели, дека и покрај тоа што има повеќе актери на повеќе нивоа, заедничко кај извршителите кои директно влијаат врз формирањето на јавното мислење е тоа што генералните инструкции ги добивале од еден центар и дека вистината не е цел, туку конструкција на аргументи согласно со инструкциите што ги добиле. (М.Ј.)