Божидар Димитров фатен во корупција

Бугарскиот министер за дијаспора си прикачил и научна титула што не ја заслужува

СОФИЈА - Бугарскиот министер за дијаспора, Божидар Димитров, профитирал од матни договори за издаваштво, тврди бугарскиот неделник „168 часа“. Неделникот објави дека во последните неколку години контроверзниот министер и познат историчар склучил договори со општините во југоисточна Бугарија за издавање книги што ги напишал тој, и кои биле објавени од фирмата „Акшена 2007“, од која една третина е сопственост на неговата ќерка Марија Димитрова. Луксузните изданија посветени на историјата на секоја од општините ги чинеле локалните администрации меѓу 15.000 и 60.000 бугарски лева. Една од историските книги, наводно, била ��дново печатена, бидејќи била критикувана од локалните историчари за „многу правописни, фактички и стилски грешки“, а сите според неделникот биле „со многу сјајни фотографии и малку текст“.

Неделниот весник му дал наслов на написот, употребувајќи игра на зборови со името на Димитров и неговите познати изјави по откривањето на наводните останки на свети Јован Крстител во Созопол, при што тој ги нарече Бугарите и бугарските археолози „зае…ни (факинг) луѓе“. Грубиот превод на насловот во „168 часа“ на англиски јазик е „Факидар Факеров“.

Неделникот, исто така, пишува дека академската титула на Димитров што ја добил на бугарската Академија за науки во 1985 година е „виш научен соработник, втор степен“ и дека не треба да се нарекува „професор“, како што е познат. „Тој тврди дека никогаш не се нарекувал професор, па така тоа звање мора само да се залепило на неговото име“, се наведува во написот. (Софиска новинска агенција)

Пасош и за донации

СОФИЈА - Новите измени на бугарскиот Закон за државјанство овозможуваат луѓето што донирале многу средства во културни институции да станат државјани на Бугарија.

Во интервју за бугарскиот дневен весник „Стандард“, министерот за бугарската дијаспора, Божидар Димитров, истакна дека американски и канадски државјани веќе добиле бугарски пасош со таа постапка.

Донациите мора да бидат над 100.000 евра и наменети за бугарска културна институција. Инвеститорите со над 1 милион бугарски лева, исто така, добиваат привилегиран третман, како и луѓето кои се истакнати во истражувачка област или спорт.

Со оваа одлука Бугарија тргна по стапките на Црна Гора, која минатата недела објави дека ќе им даде државјанство на сите оние што ќе внесат над 500.000 евра инвестиција во земјата, а што беше дочекано со гнев во Германија, од каде што побараа укинување на визниот режим за оваа земја. (Н.Р.).