„Евросонг“ од Осло се сели во Дизелдорф

На конечната одлука најмногу и' се израдува геј-популацијата, која е најбројна во градот-домаќин на „Евросонг 2011“

l Полуфиналните вечери ќе се одржат на 10 и 12 мај, а финалето е закажано за 14 мај 2011 година

l Арената „Фортуна“ во Дизелдорф собира 54.000 лица, а за потребите на „Евросонг“ нејзиниот капацитет ќе биде намален на 24.000 гледачи

l Трошоците околу организацијата на манифестацијата приближно изнесуваат околу 30 милиони евра

Конечно заврши неизвесноста околу финалната одлука кој ќе биде градот-домаќин на новото евровизиско издание „Евросонг 2011“. По неколкумесечно размислување, германскиот град Дизелдорф излезе како победник во конкуренција на Берлин, Хамбург и Хановер, соопшти германската радио-телевизија НДР.

Благодарение на победата на германската претставничка Лена и нејзината песна „Сателит“, најголемата европска музичка манифестација се сели во Германија. Полуфиналните вечери ќе се одржат на 10 и 12 мај, а финалето е закажано за 14 мај 2011 година, во арената „Фортуна“ во Дизелдорф, која собира 54.000 луѓе, а за потребите на „Евросонг“ нејзиниот капацитет ќе биде намален на 24.000 гледачи. Иако во почетокот се веруваше дека Берлин природно ќе биде конечен избор, излезе дека „Евросонг“ е преголем финансиски залак за овој град. Трошоците околу организацијата на манифестацијата приближно изнесуваат околу 30 милиони евра, што е дополнителен товар за главниот град во кој во последниве години се преселија многу фестивали и разни други манифестации. Хановер, пак, градот од кој потекнува актуелната победничка Лена не беше во сериозна конкуренција за избор на град-домаќин. Посебно ако се има предвид дека во конкуренција беа значително поинтересните и културно побогатите Берлин и Хамбург.

Дизелдорф, секако, е изненадување. Зошто токму овој град?

Во него се одржуваат повеќе саеми, но и значајни модни случувања. Дизелдорф е главен град на германската покраина Северна Рајна Вествалија, познат е и по карневалските прослави, а го спомнуваат и во редот на петте најзначајни германски метрополи, заедно со гореспоменатите Минхен и Франкфурт. Музички гледано, Дизелдорф најмногу придонесе за популаризацијата на новите музички правци во Германија, пред се', на електронската музика. Култните пионери „Крафтверк“ потекнуваат токму од Дизелдорф. И ноќниот живот во градот е прилично разновиден и богат. Тука е и прочуената арена „Еспирит“, мултифункционален стадион на кој се играат и натпревари од Бундес-лигата.

Но, ако некој се радува на доаѓањето на „Евросонг“ во Дизелдорф тоа е сигурно геј-популацијата, која е најбројна токму во овој дел од Германија, како и многуте фанови од Холандија, Белгија и од Луксембург, на кои ќе им биде потребно еден-два часа за да стасаат на евровизискиот натпревар.