Цеца и Карлеуша на конечна пресметка во Скопје

Двете најпопуларни српски пејачки и ривалки Светлана Цеца Ражњатовиќ и Јелена Карлеуша закажаа конечна пресметка во Скопје, каде што во втората половина на ноември ќе одржат концерти во спортската сала „Борис Трајковски“, во растојание од една недела, пишува српскиот печат.

Карлеуша подготвува спектакл на 20 ноември, насловен „Се' за дивата“, кој премиерно и' го претстави на српската публика на 15 мај во белградска „Арена“. Првпат ќе настапи пред македонската публика на голем концерт. Една недела подоцна, на 26 ноември, на истото место ќе запее и Цеца, со што ќе го исполни ветувањето дадено на „Пивофест“ во Прилеп дека наесен ќе го промовира новиот албум со концерт во Скопје. Како што пишуваат српските медиуми, Цеца во Скопје ќе пристигне два дена пред концертот со екипа од 28 луѓе (бенд, придружни вокали, стилисти и лично обезбедување) за кои ќе биде закупен цел кат од хотел. Тие шпекулираат и дека нејзиниот хонорар изнесува 70.000 евра.