Божикен концерт со првите оргули во Македонија
Овој ден ќе биде запишан во историјата како настан, кога прв пат на македонска почва се слушна звукот на оргулите, рече бискупот Стојанов
Во католичката црква „Пресвето Срце Исусово“ во Скопје, синоќа се одржа Божикен концерт со првите орули во Република Македонија. Пред почетокот на концертот, управителот на Работилницата за оргули во Марибор, Бране Кошир на скопскиот бискуп и апостолски егзарх во Македонија Киро Стојанов свечено му ги предаде клучевите од оргулите, по што тие беа осветени. По тој повод, бискупот Стојанов изјави: „Прв пат Република Македонија се здоби со еден многу вреден музички инструмент - оргули. Овој ден ќе биде запишан во историјата како настан, кога прв пат на македонско тло се слушна звукот на оргулите.“
На Божикниот концерт настапија оперската пејачка Милка Ефтимова, маестро Борис Трајанов и светски познати уметници од Австрија, Албанија, Хрватска, Полска и Словенија. Концертот беше проследен од претставници на верски заедници во Македонија, пратеници, уметници и културни работници, како и дипломатскиот кор во земјата, а бискупот Киро Стојанов им врачи благодарници на премиерот Никола Груевски, на министрите за надворешни работи и за култура Антонио Милошоски и Елизабета Канческа Милевска, на апостолскиот нунциј во Македонија монсињор Сантос Аврил и Кастиљо и на Работилницата во Марибор за поддршката на акцијата „Оргули за Скопје и Македонија“. (К.Р.)
|
