Го уценувал брата си за да ќари „ауди“ и пари

Триесет и осумгодишен скопјанец е уапсен откако два месеца го уценувал брата си, кој живеел во Швајцарија. Според МВР, се' започнало кога М.Н. (38) од Скопје бил на гости кај својот 49-годишен брат во Швајцарија. Таму снимил компромитирачки материјал од својот брат, кој бил во сексуален однос со државјанка на Швајцарија. Откако се вратил во Скопје, а во меѓувреме им прекинала соработката по однос на користена техничка стока од Швајцарија, М.Н. му се јавил на брат му и му се заканил дека ќе ги објави снимките на „Јутјуб“ за да ги види сопругот на жената на снимениот материјал. Како доказ дека не се шегува, дури и пуштил краток материјал на „Јутјуб“.

Од брата си побарал ново „ауди А-3“, како и шест шлепери со разна техничка стока во вредност од 72.000 евра.

„За да ја исполни својата цел, тој од УСБ-то направил повеќе копии на ЦД-иња и продолжил да го уценува, барајќи од него да ги исполни барањата“, велат од полицијата.

Во понеделникот нашинецот допатувал од Швајцарија, носејќи го и бараниот автомобил. Откако го пријавил случајот во полиција, се сретнал со алчниот брат, биле на нотар да заверат полномоштво, но кратко време подоцна М.Н. бил уапсен. Бил вооружен со пиштол што го поседувал без дозвола. Кај него дома биле пронајдени уште неколку ЦД-а со компротимирачки материјал, кои планирал да ги искористи против брата си, велат од полицијата. (Г.А.)