Претходен број

Заев ја обвини власта дека ја води Македонија во црна дупка

Фамилијата прави хотели во Чешка каде што мисли да побегне кога ќе ги урнеме од власт, вели Фрчкоски

Ангел Данов


КАВАДАРЦИ - „Со едноумието на Груевски и на неговата тајфа, Македонија запаѓа во длабока црна дупка со црна иднина за граѓаните, поцрна и од црното тиквешко. Ако Кавадарци е град на грозјето и виното, а велиме дека во виното е вистината, тогаш вистината за Македонија е многу поразителна и болна. Ќе употребам кавадаречки збор, лита е оваа власт, полита не може да се најде на светот, ниту во Буркина Фасо, ниту во Брегот на Слоновата Коска, ниту во Папуа Нова Гвинеја. Лита власт со излитени методи од минатото својствено на Гебелс и нему сличните”.

Со овие зборови им се обрати на кавадарчани завчера вечер в.д. лидерот на СДСМ, Зоран Заев, кој додаде дека ако актуелниот миг се гледа низ чаша бело или розе вино, повторно ќе се види Македонија матна. Заев му порача на Груевски да се чува од бесот на стрпливиот човек, бидејќи со таков бес ќе се соочел од кавадарчани. Преродбата на Груевски ја спореди со реката Луда Мара, која минува низ Кавадарци

Од жителите на Кавадарци побара доверба и претседателскиот кандидат на СДСМ, Љубомир Фрчкоски, кој ја обвини актуелната власт дека во изминативе три години ја направила Македонија најсиромашна држава во регионот. Подршка побара за, како што рече, да се турне најлошата и најгрдата гарнитура, која било кога владеела со Македонија.

„Фамилијата што владее со нас прави хотели и трговски центри во Чешка и во Словачка, каде што мисли да побегне кога ќе ги урнеме од власт. Но, ќе ни ги остават вмровчињата да ни се закануваат. Сега ви ѕвонат по телефон, ве притискаат за кого да гласате. Тие нека му ја мислат сега, бидејќи ние нема да му ја мислиме после“, ��ече Фрчкоски и ја обвини актуелната власт дека вработува само луѓе кои имале наредба да најдат 20 гласачи за власта.

„Вмровските влади секогаш го оставаат прашањето дали треба да ја биде Република Македонија или не. Нема пари во земја која е изолирана. Претураме од шупливо во празно. Секоја трета кола во Македонија е со бугарски таблици. За две години ќе има 200 илјади Бугари. Круна на недостоинството е некадарен човек, човек кој ќе не' срами.Мислат дека и магаре да врзат ќе помине, но на 22 март ќе видат дека не е така”, потенцира претседателскиот кандидат на СДСМ.

Подобри услови за живеење на сите граѓани и подобра иднина за младите вети пред своите сограѓани Ратко Грков, кандидат за градоначалник, кој во изминативе четири години беше претседател Советот на Кавадарци.

„Целта на секој нов градоначалник на Кавадарци мора да биде вработувањето, промоцијата на нови стопански објекти, мора да има подобрување на инфраструктурата’’, потенцираше Грков.