Граѓански карван за еднакви можности
Информирање и зголемување на мотивацијата кај инвалидизираните лица постари од 18 години за да го реализираат своето гласачко право на претстојните претседателски и локални избори во Македонија, како и нивно вклучување во програмите на политичките партии, се целите на проектот „Граѓански карван за еднакви можности - Избори 2009“.
Проектот го спроведува хуманитарната организација „Венера“, НВО од Прилеп, во партнерство со истражувачкиот и консалтинг-центар „Питер Ф. Дракер“.
Миле Стојкоски, учесник во проектот, информираше дека од 1 март го започнал патувањето со инвалидска количка низ Македонија со цел да има средби со инволвираните лица во изборите, да ги слушне нивните идеи, програмски определби и искуства кои се однесуваат на инвалидизираните лица како посебна популација. Тој потенцира дека до 20 март годинава ќе посети 24 града и ќе помине околу 1.000 километри.
Стојкоски потсети дека според законска регулатива, немоќните и инвалидизирани лица доколку сакаат да го остварат своето гласачко право, треба да се пријават до Изборната комисија во својата општина. (П.Р.) |
