Наградата „Григор Прличев“ за поемата „Адам од Говрлево“

Комисијата во состав Паскал Гилевски, Блаже Миневски и Нина Анастасова Шкињариќ одлучија наградата „Григор Прличев“ одлучија годинава да и ја доделат на поемата „Адам од Говрлево“, која на конкурсот за најдобра необјавена поема што го распишуваат „Детска радост“ и Центарот за култура „Григор Прличев“ од Охрид пристигна под шифрата „АСКОС“.

Како што истакнаа членовите на комисијата од вкупно пристигнатите 25 поеми во најтесен избор биле уште и поемата „Илуминација. Самување“, пристигната под шифрата „ПОЕТ“ и „Потомците на Чрт“, под шифра „Чрт“.

На вчерашната средба со новинарите претседателот жирито, Паскал Гилевски потенцираше дека поемата „Адам од Говрлево“, која има 960 стихови, се издвоила со својот квалитет и со „прличевскиот дух“ од 25-те ракописи кои пристигнале. „Во овој поетски ракопис поетот ги ситуира на временска оска библискиот Адам од Книгата на постанокот и актуелниот Адам од Говрлево или Адам од Македонија, неодамна пронајдена машка фигура, машко торзо во седечка положба на археолошкиот локалитет Говрлево, Скопско“, рече Гилевски и потсети дека фигурата датира од 4 и од 3 милениум пред нашата ера и била презентирана пред публиката во 2006 година.

Во поемата „Адам од Говрлево“, како што рече, поетот го воспева ова милениумско откритие, потенцирајќи ја притоа ненаметливо древноста и светоста на својата земја. „Седумте пеења од поемата кои се кодирани во старозаветниот библиски код, како да имаат за цел да го прогласат Говрлево за центар и стожер на светот, во поетска смисла.“

Наградата се состои од паричен дел во износ од 1.500 евра, а организаторот има и обврска да ја отпечати наградена поема. Свеченото врачување на наградата ќе се случи на 6 февруари во Охрид, родниот град на Прличев. (Н.П.)