Франција го исфрли шампионот Шпанија

Србите ги совладаа Хрватите во Сплит, во ексјугословенската пресметка во Дејвис купот

Франција ги уништи надежите на Шпанија за хет-трик во Дејвис купот, откако со победата во двојки обезбеди недостижно водство во дуелот од четврт-финалето во Клермон Феран. Домашниот дубл Мишел Јодра и Жилиен Бенето ги совладаа Фернандо Вердаско и Фелисијано Лопез со 6-1, 6-2, 6-7 (6), 7-6 (5), заверувајќи ја првата победа на „триколорите“ над „фуријата“ во Дејвис купот по 1923 година!

„Се надевам дека ова е почеток на долга приказна за нашите тенисери. Тие, едноставно, беа извонредни и се надевам дека ќе играат со истиот мотив и во септември“, изјави францускиот капитен Гиј Форже.

Јодра изјави дека се надева оти Франција, која своето последно финале го играше во 2002 година, ќе отиде чекор понатаму и ќе ја освои популарната „салатара“.

„За илустрација, имав 11 години кога ги гледав Форже и Анри Леконт како слават над САД во финалето на Дејвис купот во 1991. Мојот сон отсекогаш беше да ги достигнам. Ние го победивме бранителот на титулата и тоа е фантастично“, одушевен е Јодра.

Првиот поен на Франција и' го донесе Гаел Монфис со победата над Давид Ферер од 7-6 (3), 6-2, 4-6, 5-7, 6-4, а по него се радуваше и Јодра, кој против Вердаско одигра четири сета: 6-7 (5), 6-4, 6-3, 7-6 (2).

Србија ја доби тениската бившојугословенска пресметка со Хрватска, и тоа во „Спаладиум арена“ во Сплит, откако Новак Ѓоковиќ вчера го донесе решавачкиот поен со победата над првиот домашен рекет Марин Чилиќ од 6-3, 6-3, 6-2. Гостите го отворија натпреварот со победата на Ѓоковиќ над Иван Љубичиќ од 7-6 (3), 6-4, 6-1, а „коцкестите“ израмнија преку Чилиќ, кој го совлада Виктор Троицки со 6-4, 7-5, 6-2. Потоа српската двојка Јанко Типсаревиќ и Ненад Зимоњиќ беше подобра од Чилиќ и Иван Додиг со 6-3, 6-2, 6-4.

Полуфиналето го досегнаа и Чесите со недостижното водство од 3:0 над Чиле во Кокимбо. Иво Минар го „прегази“ Николас Масу со 6-0, 6-2, 6-3, Јан Хаел беше уште поубедлив против Пол Капдевилја (6-0, 6-2, 6-1), а Хаек и Лукас Длухи ги добија Масу и Хорхе Агилар со 7-6 (3), 6-3, 3-6, 6-3.

Русија и Аргентина синоќа во Москва требаше да го довршат натпреварот во кој беше израмнето 2:2.