Леб најбрз во првата трка во Бугарија

Себастијан Леб забележа уверлива победа на првото „Рели Бугарија“, што е четврти триумф на возачот на Ситроен сезонава. Шесткратниот светски првак заврши 29,5 сек. пред тимскиот колега Дани Сордо, а Норвежанецот Петер Солберг, кој исто така вози за Ситроен, го освои „само“ третото место и покрај победата во пет од последните седум етапи од асфалтната трка долга 354 км.

Себастијан Ожер, кој во мај во Португалија ја оствари својата прва победа во кариерата, се искачи на четвртата позиција откако загуби време возејќи крај патот во првиот ден од релито. Мико Хирвонен беше највисоко пласиран возач на Форд со своето петто место, а шести заврши неговиот тимски колега Јари-Мати Латвала.

Леб, кој атакува на својата седма титула во низа, го зголеми своето салдо на 58 победи во кариерата, а ја зголеми и предноста во вкупниот поредок сезонава. Французинот има 151 бод, а го следат Ожер со 100 и Хирвонен со 86.