Миле, Цацко и Тошо дремат на шалтер

Момците од „К-15“ се надеваат дека нивниот нов сингл ќе иницира реформи во современата администрација

Момците од популарното хумористично трио „К-15“ - Миле, Цацко и Тошо се надеваат дека преку својот нов сингл, насловен „Шалтер“, ќе поттикнат реформи во современиот административен систем. Песната, која доаѓа по двегодишна музичка пауза на триото, за тематика ја има љубовта, но кон сопствената професија. „Оваа песна и спот ни се посебно важни поради тоа што обработуваат една многу битна тема за денешново време во коешто живееме, станува збор за современа, љубовна тематика. Тоа е за огромната љубов на еден млад човек спрема сопствената професија. Толку е заљубен во неа што на крај, кога веќе ќе остане без неа, е изгубен и не може да се снајде. Тој човек работи како современ административен шалтерски работник“, објаснува Бубо Каров, алијас Цацко Конопишки. „Мислам дека овој спот толку ќе ја трогне јавноста што може да доведе до драстични промени во современата администрација, односно во нивниот однос спрема својата професија. Тоа е нешто неверојатно: како може еден млад човек да си ја сака својата професија, а да работи на шалтер“, вели Бубо.

Авторски зад песната стои целата екипа на „К-15“, а спотот кој веќе може да се погледне на ТВ е снимен во киното „Фросина“. Темата е реализирана во студиото „Мјузик бокс“, продуцирана е од Влатко Георгиев, а како гостин со својот устен ритам се појавува Момир Колев, кој беше меѓу суперфиналистите на „К-15 репродукција“. (К.Ш.)