Велешката полиција поднесе кривична пријава против 32-годишниот Р.С. од Велес поради вонбрачен живот со малолетно лице. Според СВР - Велес, Р.С. го запознал 15-годишното девојче пред пет недели кога таа била физички нападната од друго лице. Тој ја убедил дека сака да и' помогне, по што и' понудил да отиде кај него дома да се одмори. Кога девојчето сакало да си оди, тој почнал да и' изјавува љубов, барајќи од неа да остане и да му биде жена. Откако малолетничката не се согласила, ја принудил на сексуален чин.
Два дена подоцна, девојчето успеало да го наговори Р.С. да ја пушти дома, бидејќи ја барале родителите. Велешанецот ја пуштил, но и' наредил да им каже на родителите дека ќе се омажи за него. Две недели подоцна, девојчето се сретнало со 32-годишниот маж за да му каже дека не сака да имаат никаков контакт. Но, како што велат од велешката полицијата, Р.С. ја разубедил тинејџерката да одат кај него, каде што повторно ја присилил на сексуален чин.
Од полицијата велат дека Р.С. веќе бил пријавуван за нарушување на јавниот ред и мир и за трговија со дрога, за што му биле изрекувани и затворски казни. (Г.А.)
