Неизвесна екстрадиција на обвинет од Белград

Од српското Министерство за правда се' уште нема никакво известување дали десеттообвинетиот во случајот „Мавровски работници, Сафет Огриќ, би можел да биде екстрадиран во земјава. Со ваква констатација вчера излезе претседателот на Судскиот совет, кој постапува во овој предмет, судијата Горан Бошевски, кој додаде дека интересите на обвинетиот Огриќ во иднина ќе ги застапува адвокатот Џемаил Арифи.

Судијата Бошевски им даде рок од осум дена на повеќемина обвинети што беа застапувани од адвокатот Таип Елези да го известат судот кој адвокат ќе ги брани во натамошниот тек од судењето. Доколку тие не го информираат судот кого го ангажирале, тогаш за нив ќе биде одреден бранител по службена должност. Таип Елези од пред извесно време е именува за судија на Основниот суд во Гостивар, па тој повеќе не ќе може да ги застапува оние обвинети, меѓу кои и пратеникот Хисен Џемеили, кои досега ги користеа неговите услуги.

Поради овие причини, судењето за првиот хашки предмет доживеа уште едно одложување, а следното судско рочиште е закажано за крајот на ноември. (Љ.С.)