Нуркачите бараат старо оружје

Охрид - Охридските нуркачи до 24 април ќе бараат старо оружје на дното на езерото кај месноста Сараиште. Станува збор за продолжување на проектот од пред две години кога на истиот локалитет беа најдени и препарирани 70 парчиња турски кубури, пушки и сабји од 17 и од 18 век.

„Се претпоставува дека оружјето е фрлено при изведување на акцијата на отоманската власт за разоружување на населението што во охридската каза било изведено на 15 август 1910 година. Акцијата се одвивала три дена во Охрид и седум дена во селата. Биле собрани 400 парчиња оружје“, вели Никола Целакоски , кустос-историчар во Завод и Музеј од Охрид. Според турски документи, акцијата не била успешна, па затоа биле блокирани куќите и дворовите, а подоцна била воведена воена состојба за разоружување на Битолскиот округ. (С.И.)