Словенците во очај

Лендон Донован во 91 минута им даде гол на Алжирците и обезбеди осминафинале за САД

Словенечките фудбалери неколку минути живееја во илузија дека ќе бидат дел од осминафиналето. Откако заврши нивниот меч со Англија (0:1), Словенците со стиснати палци ги следеа случувањата во Преторија каде играа САД и Алжир.

Се' им одеше од рака до сусиското продолжение, а потоа - шок! Во 91 минута Лендон Донован, конечно, ја искористи едната од многуте шанси на САД. Ги матираше Алжирците и Словенците ги прати дома, обезбедувајќи осминафинален меч за својата репрезентација со Гана.

„Тешко е сега да се каже нешто паметно. Разочарани сме, но може да бидеме горди на четирите бода што ги освоивме. Денес беше тешко. Англија го покажа својот квалитет, но се' можеше да излезе поинаку. Покажавме дека сме одличен тим“, изјави капитенот на Словенија Роберт Корен.

Златко Дедиќ кажа дека репрезентацијата пред себе има добра иднина.

„Тешко е сега да се најдат вистински зборови...Немавме среќа. Фудбалот се врати во иднината. Ќе им носиме радост на навивачите и натаму, дури и повеќе отколку на ова првенство“.

Напаѓачот Златан Љубљанчиќ опиша што се случувало во последните минути. „Мислевме дека мечот меѓу САД и Алжир заврши 0:0, ама кога ни кажаа дека, сепак, на крајот паднал гол, бевме во шок. Мислам дека по неколку проспиени ноќи ќе исчезне таа горчина, бидејќи Словенија си оди дома со крената глава“.