Ноќна смена на „Илинденска“

Лекари велат дека министрите се државни службеници,
така што и тие би требало да работат 8 часа дневно

Жаклина Ѓорѓевиќ

Цели петнаесет часа траеше завчерашната владина седница, која почнала околу 13 часот, а завршила во 5 часот наутро. На седницата, како што не' известија од Владата, присуствувале сите министри, со исклучок на шефот на дипломатијата, Антонио Милошоски, чие отсуство било оправдано со неговиот престој во Чешка. Но, немало оправдување за другите министри. Некои од нив, како што неофицијално дознаваме, иако не се чувствувале добро, морале да присуствуваат на седницата, која завршила во раните утрински часови. „Ваквото темпо на работа не е ништо невообичаено за оваа Влада“, ни изјави владиниот портпарол, Мартин Мартиноски.

Маратонските владини седници им станаа навика на министрите. Од Владата го објаснуваат турбо работењето со тоа дека морал да се помине обемниот дневен ред. Сепак, министрите не кажуваат дали колабираат или дали се чувствуваат преморени по километарските расправи во Владата и дали можат да ги извршуваат редовни��е работни обврски наредниот ден. Напротив, тие тврдат дека пренатрупаниот распоред со обврски не им претставувал никаков проблем.

На оваа тема контактиравме и со експерти од медицина на трудот, кои ги прашавме: „Колку може да биде продуктивен еден човечки организам ако континуирано работи повеќе од осум часа“? Доктор Тихомир Матевски од Институтот за медицина на трудот објаснува дека законски работното време изнесува осум часа. „Министрите се државни службеници, а бидејќи во законот е регулирано да се работи осум часа, и тие би требало да работат толку“, ни изјави докторот. Исклучок, според него, има само кога е во прашање работа во рудник, окно или онаму каде има преголема оптовареност, така што за вработените е предвидено скратено работно време. А кога го прашавме колку може некој да биде продуктивен ако работи повеќе од осум часа тој ни одговори: „Проценете сами колку вие можете да издржите?“

Владиниот портпарол, Мартиноски, ни појасни дека ова не е прв пат министрите да заглавуваат на владините седници до рано наутро. Тој ни потврди дека ова се случувало почесто на последните седници, кога се останувало до 3 или 4 часот наутро, а една од седниците пред Нова година исто така траела до 5 часот. Министрите за време на седниците, како што ни објаснија, имаат право на едночасовна пауза за ручек, но, како што самите велат, не им е забрането и да одат до тоалет или да излезат накратко. Вработените во владините служби коментираат дека најбуден од сите министри на владините седници, без разлика колку траат, е министерот за правда, Михајло Маневски, кој со внимание ги следи сите точки на седниците.

Завчерашната седница била од отворен и од затворен тип. Отворената владина седница траела до три часот наутро, а затворената продолжила до 5 и на неа се разгледувале „класифицирани информации“. На отворената седница имало повеќе точки на дневен ред, од кои најмногу за здравство. Била донесена одлука за вработување на 280 доктори, сестри и техничари во јавните здравствени установи. Неофицијално, дознаваме дека на едниот од министрите не му било добро, но тој не ја напуштил седницата, туку побарал да му донесат „фервекс“. „Министрите или нивните заменици остануваат подолго на владина седница во случај да има повеќе информации или предлог-измени“, појаснува Мартиноски. Тој вели дека министрите можат да се заменат со нивните заменици во случај да имаат претходно закажани средби или активности. Понекогаш, додава портпаролот, се канат и експерти, односно гости зависно од проблематиката. (Ж.Ѓ.)