ЕУ е главна цел за граѓаните

Македонските граѓани не се откажуваат од желбата за членство во Европската унија – дури 90 проценти од нив ја поддржуваат интеграцијата на земјата во Унијата. Тоа го покажуваат резултатите од истражувањето на Евробарометарот за Македонија направено од 11 ноември до 1 декември 2010 година, во членките на ЕУ и во земјите-кандидатки.

Од испитаниците, 59 отсто го сметаат членството во Унијата за добра работа, што претставува незначително намалување во однос на мај 2010 година (60 отсто). Процентот на испитаниците што очекуваат придобивки од зачленувањето во ЕУ, исто така, благо опаднал (од 73 на 69 отсто), но е и натаму повисок во споредба со другите земји-кандидатки. Стабилно мнозинство граѓани (56 отсто) имаат позитивна слика за Унијата, при што најголем дел од нив ја доживуваат како „модерна", „демократска" и „заштитничка".

Анкетирањето било на репрезентативен примерок од 30.780 испитаници на возраст од 15 години нагоре и претставува индикатор за ставовите и за размислувањата на сите социјални, професионални и возрасни групи од урбаната и руралната популација.

Според резултатите од истражувањето, мнози��ството граѓани и натаму ја сметаат невработеноста за главен проблем во земјата и нивниот број во меѓувреме се зголемил од 63 отсто на 66. Втор најголем проблем за испитаниците е состојбата во домашната економија, иако јавната загриженост во однос на ова прашање благо опаднала (од 46 отсто на 44). Мнозинството граѓани во земјава (52 отсто) ја оцениле како добра финансиската состојба во своите домаќинства.  (Н.Р.)