Брисел ќе ги враќа визите ургентно

Азилантите од Македонија и од Србија и' испровоцираа нова политика на Унијата за визите

Слободанка Јовановска



Советот за правда и внатрешни работи неделава ќе се изјасни за предлогот на Европската комисија за воведување брз механизам со кој ако побара некоја земја-членка, ќе можат да се вратат визите за земјите што сега се на белата шенген-листа. Одлуката беше најавена од минатиот декември, но сега треба да биде прифатена и ако се случи тоа, што е речиси извесно, можно е да се врати визниот режим за Македонија и за другите земји од Западен Балкан.

Јохан Мулер, одговорен за правда и внатрешни работи во Советот на ЕУ, изјави за „Утрински весник“ дека одлука за враќање на визите за Македонија сега нема да има, но се отвора таква можност за во иднина, ако некоја од државите се пожали дека состојбата со азилантите е вонредна и не може да се контролира.

„Европската комисија се обврза дека ќе излезе со предлог за ваков итен механизам што би се активирал во случај на масовен прилив на азиланти од нек��ја балканска земја. Со него би се вовела суспензија на визниот режим за одреден период“, соопшти Мулер. Најново е што Франција и Холандија бараат ваквиот механизам да не се применува само за Балканот, туку да важи и за други земји и региони, бидејќи сега ЕУ нема начин како да се заштити и да ги врати визите ако некоја земја добила укинување. Како пример, тој го спомена случајот со Чешка, која бара ЕУ да и' одговори со реципроцитет на Канада за воведување визи за оваа земја-членка, но Брисел не може да го спроведе тоа, бидејќи нема такова регулатива.

Произлегува дека Балканот повторно запали црвен аларм во ЕУ и даде причина да се смени цела една регулатива во оваа област. Врз одлуката, веројатно, ќе влијаат и случувањата во арапскиот свет, кои со ескалацијата, ја зголемуваат опасноста од огромен бран бегалци кон Европа, па сите влезови на Унијата ќе мора посилно да се контролираат.

Ваквата можност вчера ја најави и европарламентарката Тања Фијон, според која, поголем број држави имаат забелешки поради големиот број азиланти од Србија и од другите држави од регионот. Според неа, во случај на сериозно кршење на обврските, земјите-членки може да побараат Србија или некоја друга држава да бидат на црната шенген-листа.

- Таа можност постои и се плашам дека без сериозна одговорност на владите, постапката за враќање на визите ќе биде покуса, бидејќи одделни држави како Франција и Холандија сакаат да ја забрзаат процедурата. Тој предлог извесно време е во оптек и важи за вонредни ситуации доколку има многу азиланти. Со таква одлука би се заобиколил Европскиот парламент, појасни Фајон.

Ако се прифати таа иницијатива, според неа, тоа би значело замрзнување на визната либерализација од одредено време, „можеби на неколку недели или месеци“.

- Тој принцип е предложен за да се носат некои одлуки брзо, без промена на уредба и целиот процес на одлучување. Би била потребна само согласност од сите членки. Свесни сме дека веќе неколку месеци ЕК загрижено го следи постоењето на вонреден број азиланти, изјави Фајон.

Европската унија го започна процесот на укинување на визите од предминатата година, и во него беа вклучени некои острови од Пацификот, балканските земји, а во тек беа процедури и за Русија и други бивши советски држави. Со мерките што се најавуваат сега, ЕУ покажува дека, практично, се покајала и дека бара начин како да ретерира.