Претходен број

Поглед

Циркус во Аеродром

Даниела Трпчевска

Најголемата скопска општина Аеродром деновиве повторно е во фокусот на вниманието. Откако нејзиниот легендарен градоначалник во саботата приреди вистинска претстава за полицијата и за новинарите, денеска се очекува втора рунда од мечот Кирил Тодоровски – Југослав Зиберовски.

Очите од петокот се ширум вперени кон општинските простории откако Тодоровски по пет месеци поминати во притвор ја напушти Шутка и најави враќање на голема врата во општинскиот стол. Арно ама, градоначалничкиот стол во меѓувреме го пополни заменикот Зиберовски, кој утринава исто така очекува да си седне на своето место. Ќе има ли доволно простор за двајцата да ги собере во удобната фотелја или утринава ќе има вистинска трка кој попрво да стаса на работа.

Сеирџиите очекуваат вистинска драма во општинската зграда, знаејќи го упорниот карактер на градоначалникот, кој пред судот одговара за поткуп од 100.000 евра. Иако беше пуштен на домашно лекување поради нарушено здравје, тој завчера витално поита да ги смени бравите на канцелариите „за да го спречи криминалот во Општината“, сеејќи страв и трепет. Како што тргнала работава, Тодоровски само со еден потег планира да ги врати конците во свои раце и да ја „спаси“ Општината, па по цена ако треба и херметички да си ја запечати канцеларијата за никој да не може да го допре „волшебното столче“.

Законски, Тодоровски слободно може од утре повторно да си заседне во градоначалничката фотелја, бидејќи судскиот процес против него не е завршен, ниту пак се знае каква ќе биде пресудата. Арно ама, судот го пушти за дома да се лекува поради нарушеното здравје, па сега никому не му е јасно дали, всушност, трчањето по општинските канцеларии е дел од терапијата.