Катица Ќулавкова избрана за потпретседател на Меѓународниот ПЕН
Со изборот на Ќулавкова значајно е зацврстена меѓународната позиција на Македонскиот ПЕН-центар
Македонската поетеса и теоретичарка на литературата, академик Катица Ќулавкова, на 74. конгрес на Меѓународниот ПЕН што се одржа во Богота, Колумбија, избрана е за потпретседател на Меѓународниот ПЕН. Ова е големо признание за македонската култура, бидејќи ова е првпат во историјата еден член на Македонскиот ПЕН-центар да биде избран на висока позиција во Меѓународниот ПЕН.
Ќулавкова досега два мандата беше претседател на Комитетот за превод и јазични права на Меѓународниот ПЕН, а претходно беше секретар и претседател на Македонскиот ПЕН центар. По повод изборот на оваа висока функција во меѓународна организација, академик Катица Ќулавкова изјави: „Мило ми е што во рамките на Меѓународниот ПЕН ќе ја претставувам македонската култура, јазик и литература. Ова е едновремено и признание за Македонскиот ПЕН и за работата на Комитетот за превод и јазични права во последните шест години. Исто така, ова е уште една можност за афирмација на македонската книжевност, македонската кауза и идентитет“.
На конгресот во Богота беше усвоена и резолуцијата на оваа организација за заштита на влашкиот јазик и култура, предложена од Македонскиот ПЕН и Комитетот за јазични права и преводи.
„Моќта на зборот во современото општество“ беше главна тема на конгресот во Богота, во чија работа учествуваа 120 делегации меѓу кои и делегацијата на Македонскиот ПЕН предводена од претседателот Ристо Лазаров, кој по повод изборот на Ќулавкова за потпретседател рече: „Изборот на Катица Ќулавкова за потпретседател на Македонскиот ПЕН е настан од исклучително значење за Македонскиот ПЕН, за македонската литература и култура. Во овој чин Македонскиот ПЕН гледа признание за досегашниот ангажман на Ќулавкова и на Македонскиот ПЕН, но и поддршка на оваа организација, која уште во 1992 година беше прва меѓународна организација која го призна уставното име на Република Македонија, македонскиот јазик и култура. Со изборот на Ќулавкова значајно е зацврстена меѓународната позиција на Македонскиот ПЕН центар и се отвораат нови можности за натамошна афирмација на македонскиот јазик и литература“.
Следниот конгрес на Меѓународниот ПЕН ќе се одржи во октомври идната година во Линц, Австрија. (Н.П.) |
