Oд денеска ригорозни казни за фрлање ѓубре
Во вчерашната акција на Владата се исчистија диви депонии на над 200 локации во сите делови од државава
Сања Наумовска
Со организирана акција, во која учествуваа голем број граѓани, вработени во државната администрација и ученици, се исчистија диви депонии на над 200 локации во сите општини низ целата држава. Акцијата под мотото „Чиста и европска Македонија“, која ја организираше Владата, во соработка со ЗЕЛС и граѓанската организации „Ден на дрвото“, е првиот чекор во спроведувањето на Законот за јавна чистота кој беше донесен неодамна. Како што најави премиерот Никола Груевски, кој вчера собираше ѓубре во општината Центар во Скопје, од денеска секое прекршување на одредбите во законот ќе биде ригорозно казнувано. Со тоа, верува Груевски, чекор по чекор ќе се измени односот на граѓаните кон животната околина.
„Според податоците од анкетите, над 80 отсто од граѓаните ги поддржуваат новиот Закон за јавна чистота и големите казни. Од денеска ќе мора и да го почитуваат, бидејќи ќе биде казнет секој што нема да се грижи за хигиената во својот град“, истакна Груевски, кој потенцираше дека не очекува подобрување на работите преку ноќ, туку чекор по чекор со зајакнување на свеста и информираноста на граѓаните, како и со сериозна примена на законот и казните.
Покрај Општина Центар, во акцијата за чистење на дивите депонии во Скопје се вклучија и општините Карпош, Гази Баба, Ѓорче Петров и Аеродром. На кејот на Вардар во Карпош ѓубре собираше министерката за внатрешни работи, Гордана Јанкуловска, а во Гази Баба чистеа градоначалникот Коце Трајановски и вицепремиерот Зоран Ставрески. Ставрески истакна дека е важно вчерашната акција да се применува секојдневно и граѓаните да не фрлаат смет на јавните површини, со цел, како што истакна, сите да живеат во подобра и почиста животна средина.
И велешани масовно се вклучија во акцијата „Чиста и европска Македонија“. Исчистени се приоритетни локации во селото Горно Оризари, станбениот комплекс УЗУС, делницата од населбата Тунел до населбата Превалец и просторот помеѓу зградата на Општина Велес - Железничката станица и индустриската зона. Во најзагрозените делови во селото Горно Оризари се чистеше градежен шут и друг комунален отпад со механизација. По завршувањето на акцијата, тој ќе биде исфрлен на депонијата за градежен шут и на депонијата за комунален отпад во Велес. Акцијата ја поздрави и опозицискиот градоначалник на Струмица, Зоран Заев.
Во акцијата „Чиста и европска Македонија“ во Кочанско се вклучија поголем број граѓани, граѓански здруженија и асоцијации, локалната самоуправа, училиштата и приватни стопанственици. Активностите се одвиваа на четири пункта, и тоа во околината на Спомен-домот АСНОМ, кај панаѓурот и на депониите кај Покатски Пат и кај село Бели. Акцијата в�� Кочани ја поддржа и министерот за правда, Михајло Маневски, кој истакна дека со неа, всушност, започнува примената на новиот Закон за јавна чистота. „Сега го промовираме законот и ги информираме граѓаните дека треба да водат сметка за комуналната хигиена, а не да го истураат сметот каде што ќе им текне“, рече Маневски.
Во Охрид организирано се чистеше отпадот на потегот од хотелот „Гранит“ до Свети Наум, клучката на влезот во Охрид и потегот до селото Подмоле, како и патот кон Буково на патникот правец кон Битола. Со механизација се чистат и дивите депонии на градежен шут над Билјанини Извори кон селото Велестово, како и дивите депонии кон селата Долно Коњско и Старо Коњско. Акцијата во Охрид ја поддржа и министерот за финансии, Трајко Славески.
Над 500 тони комунален отпад и градежен шут беа исчистени на вчерашната акција во Гостивар. Чистеа граѓани на гостиварската населба Циглана и на селските населби Равен, Вруток, Чегране и Балиндол. Учесниците во акцијата ги посети Бујар Османи, министер за здравство, кој истакна дека на овој начин ќе се влијае на менувањето на свеста на населението, а со тоа во иднина нашата животна средина и околина да бидат почисти и поуредени. Граѓаните да го фрлаат отпадот во канти за отпадоци, а не каде што ќе им текне и каде што ќе стигнат.
Иако првично најавено на четири пункта, еколошката акција во Битола се спроведе на 40-ина локации во градот, приградските населби и сите општински училишта. „Одѕивот е одличен. Иако со Владата се договоривме за четири пункта, сепак, акцијата се спроведува на четириесетина места во градот и приградските населби, во училиштата и градинките и мислам дека подготвени го дочекуваме новиот закон со кој и ќе казнуваме“, рече битолскиот градоначалник Владимир Талески. |
