Бугарските возила непожелни

Струмичанецот Стојан Поповски викендот не можеше да се види со своето семејство во Струмица, како што тоа го правеше во изминатиот период, бидејќи живее и работи во Петрич, Бугарија. Македонските погранични органи на граничниот премин Ново Село на македонско-бугарската граница не му дозволија во земјава да влезе со својот автомобил купен и регистриран во Бугарија. Влезот не бил дозволен поради двојното државјанство на Поповски и затоа што неговиот автомобил со бугарски регистарски таблички не бил пререгистриран во Македонија. На ова Поповски нервозно реагирал, го завртел автомобилот и се вратил во Петрич.

„Не сум смеел со автомобилот да ја минам границата. Требало да се одјавам од едно место на живеење. На две места, тука и во Бугарија, не бидувало, а досега таков проблем немало, иако секој викенд доаѓав во Струмица со истиот автомобил со бугарски таблички. Ова што се случува не е в ред, фактички вака ја затвораат државата и ни го ограничуваат движењето. По ова јас се враќам во Петрич и нека не' не бараат за гласање на изборите“, изјави револтирано Стојан Поповски.

Тој е одделен од семејството, живее и работи во Петрич во последните неколку години, а бил принуден да го направи тоа на стари години, бидејќи во Струмица не можел да најде работа. Во Петрич го купил автомобилот за потребите на работата, а во Струмица доаѓал само еднаш неделно за да си го види семејството. Токму поради ова тој смета дека нема потреба да го пререгистрира возилото во Македонија. Неговиот син купил два автомобила од Бугарија и двата ги пререгистрирал согласно законите.

Стојан Поповски е само еден од дваесетина Македонци на кои изминатиот викенд на македонско-бугарската граница не им беше дозволен влез и излез со автомобилите со бугарски регистарски таблички. Слично беше и на македонско-грчката граница на преминот Богородица. На дваесетина сопственици на вакви автомобили, кои во саботата во утринските часови заминале за Грција, не им бил направен никаков проблем, но на враќање не им бил дозволен влез од македонските погранични органи доколку не ја почнат процедурата за легализирање на автомобилите. Откако виделе дека немаат друг избор сопствениците ги оставиле автомобилите кај царинската подружница, а се' уште размислуваат дали да ги пререгистрираат затоа што мислат оти ваквото барање не е в ред (Е.П.)