Тргна првиот воз на „Карго 10“

Првиот товарен воз со 42 вагона на заедничкото железничко претпријатие на Србија, Словенија и на Хрватска - „Карго 10“ - тргна од железничката станица од Батајница до словенечкото место Сежана.

Планирано е возот на таа релација да сообраќа секоја недела, а со годишниот договор е предвиден превоз на 50 илјади тони брикети дрво наменети за италијанскиот пазар.

Министерот за инфраструктура на Србија, Милотин Мркониќ, изјави дека благодарение на заедничкото претпријатие, трите држави ќе го зголемат девизниот приход за по 50 милиони евра годишно. Мркониќ изрази очекување дека по трасата на Коридорот 10 во иднина ќе минуваат 2.000 воза годишно наместо сегашните илјада.

Словенечкиот министер за сообраќај, Патрик Влачич, рече дека благодарение на ова претпријатие, железничката врска меѓу Западна Европа и Турција, која во изминатите 20 години го изгубила значењето, ќе биде искористена.

Државниот секретар во Министерството за сообраќај на Хрватска, Даниел Милета, изрази очекување дека „Карго 10“ ќе им донесе корист на економиите и на фирмите во сите три држави.

Како што е претходно договорено, седиштето на компанијата „Карго 10“ ќе биде во Љубљана. Заедничката железница ќе располага со пет отсто од вкупниот број возови на железниците во трите држави.

Една од целите на новата компанија е скратување на царинската процедура на граничните премини, со што возовите побрзо ќе сообраќаат.

Железниците на Србија, Хрватска и Словенија имаат по една третина сопственост во „Карго 10“, а во ист процент ќе биде делен и профитот.

Договорот за основање заедничка компанија е постигнат кон крајот на јули годинава, со цел превозот на стоки и патници на пан��вропскиот „Коридор 10“ да биде поефикасен, порентабилен и побрз, а патувањето од Љубљана до Истанбул да се скрати од сегашните 57 на 35 часа. (МИА)