Велес се премисли, не ја тужи државата за Топилницата
ВЕЛЕС - Судскиот процес во кој Општина Велес ја тужи државата, поради негрижата за здравјето на велешани за тридецениското труење од Топилницата, никако да започне. На последното рочиште во Основниот суд во Велес, поради тоа што не се прецизирани тужбените барања, почетокот е одложен за септември. Но, на површина излегоа несогласувањата помеѓу новата локална власт и Зелената коалиција дали да се прифати вонсудска спогодба. Се чини дека Општина Велес се премисли и дека нема да ја тужи државата за Топилницата.
„До полномошникот на тужбата на последното рочиште лани во декември е дадена обврска да ги прецизира тужбените барања, како и да се разгледа можноста за вонсудска спогодба. За ова второто може да се разговара со претставникот на државата, јавниот правобранител. Ако не, спорот ќе продолжи на суд“, изјави Горан Петров, градоначалник на Велес. Од друга страна, Зелената коалиција, составена од седум граѓански здруженија со еколошки предзнак кои се приклучија на тужбата, исклучено е секакво друго решение, освен судско.
„Не прифаќаме вонсудско порамнување, бидејќи ако не добиеме сега тука во Велес или во институциите во Македонија, убедени сме дека спорот ќе го добиеме во Стразбур, пред Судот за човекови права. Триесет години ни беше одземено правото на здрав живот, загарантирано со Устав, поради лошото работење на Топилницата“, изјави Билјана Ангеловска, правен застапник на Зелената коалиција.
Што се однесува до прецизирање на тужбеното барање, судот бара да се определат површините на загадена почва, со мерки и граници за да може врз нив да се изврши вештачење. Врз основа на оваа документација, која засега не е доставена, ќе може и да се одвива судскиот процес, Општина Велес против Република Македонија, прв од таков вид во судската практика во земјава. (С.Ќ.Н.) |
