Грчките банки ќе мора да се здружат?

Водечките грчки банки се наоѓаат под зголемен политички притисок да се интегрираат, со оглед на намалената добивка, растот на кредитните загуби и влошувањето на нивните активи, пренесува Блумберг.

Грчкиот министер за финансии, Јоргос Папаконстантину, и гувернерот, Јоргос Провопулос, ги повикале Националната банка на Грција, ЕФГ, Алфа банка и Пиреус банка да ја разгледаат можноста за здружување.

Аналитичарите проценуваат дека профитите на наведените банки за вториот квартал, што деновиве треба да бидат објавени, веројатно ќе бидат намалени за над 60 отсто.

Шпекулациите за интеграциите се зголемија откако Пиреус банка понуди да ја купи Земјоделскат�� банка на Грција, единствената што не го положи стрес-тестот на Европската унија.

Се проценува дека интеграцијата би им помогнала на банките да ги намалат трошоците, да ги зајакнат своите финансии и да обезбедат подобар пристап до пазарите на капитал.

Иако консолидацијата нема да ги реши проблемите со лошите побарувања, сепак, може да помогне да се намали конкуренцијата за депозити и да придонесе за намалување на трошоците, велат аналитичарите. Според нив, мала е веројатноста дека некоја странска банка би се одлучила во овие моменти да преземе грчка банка.

Инаку, две грчки банки од наведените, од кои било побарано да ја разгледаат можноста за спојување, се газди на банки во Македонија. Па, така, Националната банка на Грција е сопственик на најголемата македонска банка, Стопанска банка. Деновиве НБГ уште повеќе ја зацврсти својата сопственичка позиција во Стопанска банка, купувајќи уште 21 отсто од акциите, кои дотогаш беа во рацете на ИФЦ и на ЕБРД, станувајќи на тој начин газда на 94 отсто од капиталот на оваа банка. И грчката Алфа банка поседува банка со исто име во нашата држава. (Ек.Р.)