Претходен број

Соња од ТАТ лапнала уште половина милион евра

Битола - Харизматичната газдарица на поранешната пирамидална штедилница ТАТ од Битола, Соња Николовска, и по излегувањето од затвор успешно ги мами битолчани. Поранешни штедачи на ТАТ, роднини и пријатели во последните три години ги олеснила за повеќе од половина милион евра. Лековерните доверители за возврат добивале ветување дека не само што ќе им го врати заемот, туку за нив ќе има и награда, како што знае да подари само Николовска.

Според полицискиот извештај, Николовска по вторпат успеала да измами тројца од поранешните штедачи на ТАТ. Од првиот, гастарбајтер од Америка, зела дури 300.000 евра под изговор дека и' требаат да почне со нов бизнис. Од друг штедач, во осум наврати извлекла 250.000 евра, а од трет 12.000 евра. Николовска не ги поштедила ниту блиските роднини. Под изговор дека и' се потребни пари за лекување на сопругот, го испразнила нивниот семеен буџет за 2.100 евра. А од поранешен познајник побарала помош, наводно, за да може да ја плати дипломската работа на ќерка си. Пријателот, иако немал пари, и' дал брашно. Продавајќи го по приватни пекарници, Николовска од него заработила 120.000 денари. Така, газдарицата на фамозниот ТАТ вкупно се офајдила за околу 566.150 евра. На измамените битолчани како сатисфакција им останаа договорите уредно склучени на адвокат и заверени на нотар, на кои и натаму стои наведениот рок за враќање на парите.

Битолската полиција сега кривично ја гони Николовска за пет дела измама. И по 11 години од пропаѓањето на ТАТ, Битола се' уште е на колена. Поранешните штедачи не се докрај обесштетени. На своите заштеди чекаат уште 6.000 штедачи. Пирамидаланта штедилница на Николовска проголта 60 милиони евра на над 12.000 штедачи. Сопственичката одлежа само три години затвор за даночно затајување. Судскиот процес за измама, поведен од штедачите, се' уште е во тек. (А.Б.)