Неизвесна наставата во тетовското училиште

Гојко Ефтоски

ТЕТОВО - Почетокот на наставата во новото училиште во тетовската населба Дреновец изградено уште лани, се' уште е неизвесен. Иако остануваат само две недели до почетокот на учебната година, не се знае дали на 1 септември таму ќе влезат ученици. На 10 септември 2009 година новиот објект беше официјалн�� предаден во употреба од министерот за образование, Никола Тодоров.

„Должен сум да пренесам предупредувања од учениците и од нивните родители дека доколку ова училиште не ги отвори вратите на првиот училишен ден, наставата ќе се бојкотира. Се најавуваат протести и пред Министерството за образование и наука“, потенцираше Илјаз Халими, раководител на Секторот за јавни дејности при Општина Тетово на вчерашната средба со новинарите. Халими посочи дека училиштето во Дреновец, кое е едно од најсовремените во тетовскиот крај, не профункционира цела една учебна година од две причини, недостиг од инвентар и персонал. Станува збор за 29 нови вработувања, од кои 18 наставници и 11 административно-технички персонал.

„Апелирам до Владата и до министерствата за финансии и за образование да обезбедат финансиски средства и да дадат согласност за вработувања. Така, училиштето ќе профункционира“, нагласи Халими.

За изградбата на новиот училиштен објект со капацитет од 500 ученици во една смена се потрошени 120 милиони денари. Зафаќа простор од 5.200 м2, а има 50 простории - училници и кабинети.

По реакциите на Секторот за јавни дејности од Општина Тетово, Министерството за образование одобрило пари само за набавка на половина инвентар. Нема никакви најави за доопремување и за нови вработувања.

Илјаз Халими вчера потсети дека Општина Тетово пред три месеци доставила официјално барање за решавање на дел од проблемите во образованието, но дека нема никаков возвратен одговор.

„Баравме да профункционира училиштето во Дреновец. Потоа да се изгради ново училиште за основно образование на локација меѓу Голема и Мала Речица и две училишта за средно образование на просторот од тетовската касарна што и' е отстапен на локалната самоуправа. Не знаеме дали ќе се прифатат нашите иницијативи за решавање на просторниот проблем во образованието“, нагласи Илјаз Халими.