Гадафи ја скина Повелбата на ОН

Либискиот лидер го нарече Советот за безбедност совет за тероризам, а свинскиот грип-заговор

ЊУЈОРК - Либискиот лидер Моамер Гадафи вчера на заседанието на Генералното собрание на ОН скапо го наплати своето повеќегодишно отсуство од говорницата на таа организација. Својот говор, кој го почна со задоцнување, го продолжи од предвидените 15 минути на речиси стотина. Навреди голем број лидери, сегашни и поранешни, а особено Џорџ Буш и Тони Блер на кои, според негово мислење, би требало да им се суди за војната во Ирак. Од европските земји побара отштета од 7,2 билиони долари за колонијализмот во Африка.

Тој ја осуди и структурата на моќта на ОН, особено на Советот за безбедност, кој го нарече совет за тероризам, истакнувајќи дека не е само Ал Каеда терористичка организација, бидејќи постојат и други облици на терор. Во еден момент на негодување на присутните делегати, тој дури и ја скина Повелбата на ОН.

Контроверзниот африкански водач повика на обновување на истрагите за убиствата на Џон Ф. Кенеди и Мартин Лутер Кинг. Убеден е дека појавата на вирусот Х1Н1 е воен заговор, односно биолошко оружје и праша „што следува по птичјиот и свинскиот грип - рибин грип?“ Најавен како африкански крал над кралевите, Гадафи зборуваше непосредно по американскиот претседател Барак Обама, чиј говор го проследи со срдечен аплауз, поздравувајќи го како „син на Африка“. „Сега Црнецот веќе не мора да седи во задниот дел од автобусот. Американците го избраа за претседател и ние сме горди на тоа. Би биле среќни ако Обама остане претседател на Америка засекогаш“, изјави Гадафи.

Исцрпувачкиот говор до крајот не успеа да го ислуша ниту францускиот претседател Никола Саркози. Рескирајќи ги добрите француско-либиски односи замина на ручек, додека новинарите останаа да се обложуваат дали либискиот лидер ќе го надмине легендарниот Фидел Кастро, чии реферати знаат да траат и по седум часа.

Инаку, Гадафи во предградието на Њујорк традиционално се обиде да постави свој шатор, меѓутоа, во што го спречија градските власти. („Јутарни лист“)