Робови на фармите во Унгарија

Постар маж три години бесплатно служел во едно
семејство, во нечовечки услови

Цели три години постар маж служел во едно семејство во Ујкиѓош, недалеку од Бекешчаба во југоисточна Унгарија, а за тоа не добил ниту една форинта.

Живеел во штала заедно со коњите, храна добивал еднаш дневно, а често бил и физички мачен. По изненадувачкото откритие лекарите констатирале дека има повеќе скршени ребра и други повреди на телото.

Ќерката го продала 68-годишниот човек од едно ромско семејство за да заработи малку пари и да се ослободи од обврските кон него. Случајот предизвика огромен интерес во јавноста во Унгарија, а произлезе дека тоа не е единствен случај и оти во сиромашните делови во Унгарија во зафрлените салаши, се вратил робовладетелскиот период.

Скандалот бил случајно откриен, благодарение на упорноста на еден службеник од локалната социјална служба. Дедото уште во 2003 година добил решение за сместување во социјална установа, но не се појавил на преглед. Социјалниот работник успеал да ја пронајде неговата адреса и го нашол во многу лоша состојба.

„Спасете ме“, биле неговите зборови кои успеал да ги каже пред да дојде полицијата и да го одведе во старски дом во Бекешчаба.

Градоначалникот на Ујкиѓош, Золтан Себеледи, во еден дневен весник во Будимпешта изјавил дека случајот се' уште официјално не го пријавил на истражните органи, бидејќи, наводно, не знаел дека на тоа има право.

Пријави не поднеле ниту современите робови, кои некако успеале да побегнат од газдите, веројатно од страв од можни последици.

Исклучок бил еден средовечен маж од Сарваш, кој минатото лето ја искористил свадбата во куќата и побегнал. Тој веднаш се обратил во полицијата, но неколку седмици подоцна, кога требало да почне судскиот процес, ја повлекол пријавата.

Според зборовите на Иштван Силаџија, управник во Домот за бездомници во соседниот град Ѓули, годишно му се јавуваат од 10 до 15 луѓе кои се избегани од заробеништво. Меѓутоа, ниту еден од нив не поднел пријава, па на полицијата и' се врзани рацете.

Тоа го потврди и шефот на полицијата во Бекешчаба, Антал Хајду, истакнувајќи дека законските регулативи во Унгарија не го предвиделе модерното ропство.

„Држењето и вработувањето на луѓето без нивна волја може да се смета за кривично дело за повреда на личната слобода, но за акција на надлежните органи потребни се пријави и соодветни докази“, додаде тој.