Прв концерт на класична музика во Пустец
Дуото Кирил Рибарски, тромбон и Милица Шперовиќ-Рибарски, пијано, неодамна се врати од мини концертната турнеја што ја одржа од 6 до 10 септември во Албанија. Проектот на Рибарски бил поддржан од македонското Министерство за култура, а во организацијата биле вклучени и македонската амбасада во Тирана, како и Министерството за туризам, култура и млади од Албанија. Рибарски одржале четири концерти во соседната земја кои предизвикале големо интересирање кај тамошната публика.
Првиот концерт, кој дуото Рибарски го одржал на 6 септември, бил добротворен за сонародниците Македонци од Пустец, Мала Преспа. „Тоа беше прв концерт на класична музика во Пустец и претставуваше значаен настан за нас, да се доживее тој топол прием и искрен контакт со новата публика. Градоначалникот Едмонд Темелко, неговиот заменик Васил Стерјовски, директорот и професорите на средното училиште изразија желба за што повеќе вакви концерти“, велат Рибарски. „Ние им ветивме дека ќе организираме концерти со домашни и странски уметници и ќе се заложиме за обезбедување донација на пијано, пијанино или електрично пијано како би можела да заживее музичката култура во ова прекрасно македонско место“.
На 8 септември, Рибарски настапиле во Тирана на прославата што ја организирала македонската амбасада по повод празникот од осамостојувањето на Република Македонија, на 9 септември одржале голем концерт во Театарот на Операта и Балетот во Тирана, додека на 10 септември Рибарски приредиле концерт на „Интернационалниот фестивал на Дурси“, во Центарот за култура на Драч. (Т.И.) |
