Претходен број

Се разговара само за името, повтори Нимиц во Атина

Посредникот во спорот по средбата со Бакојани имаше средба и со лидерот на грчката опозиција, Папандреу

Тамара Грнчароска
Миркица Поповиќ

Еден ден по Скопје, вчера и на Атина и' беше врачен новиот предлог од медијаторот од ОН за решавање на спорот за името, Метју Нимиц, со препорака и Грција сериозно да го разгледа изменетиот октомвриски сет на идеи, како излез од проблемот.

Посредникот во грчко-македонскиот спор рече дека новиот предлог е со мали промени од предлогот од октомври, кој го содржи името „Република Северна Македонија“. Нимиц час и половина разговараше со шефицата на грчката дипломатија, Дора Бакојани, по што соопшти дека тоа бил одличен разговор на кој на Бакојани и' ги пренел впечатоците од разговорите во Скопје. „Ја известив и самиот бев известен за ставовите на двете страни“, изјави Нимиц, додавајќи оти верува оти неговата работа ќе продолжи уште подобро.

Нимиц по средбата со Бакојани даде речиси идентична изјава на онаа која ја даде во Македонија по средбите со македонскиот државен врв, велејќи дека „постои јака волја од двете страни за изнаоѓање решение“. „Верувам во разговорите за изнаоѓање решение со реципрочна добивка, верувам дека сме многу поблиску до крајно решение, за тоа сум и поголем оптимист од претходно“, изјави Нимиц. Тој и во Атина, одговарајќи на новинарско прашање за тоа дали е оптимист дека ќе се постигне напредок во решавањето на проблемот до крајот на годината, повтори оти не верува во рокови.

На прашањето да ги објасни изјавите од Скопје за националниот идентитет и јазикот на соседната земја, медијаторот одговори: „Она што се дискутира толку години е прашањето за името“, додавајќи дека „некои работи се едноставно неменливи, како фактот оти по��тои земја која во ОН се води под референцата ФИРОМ и со години посакуваме да се најде заедничко решение за името на таа земја“. „Постои јазик кој го зборува еден одреден народ, меѓутоа, ние сме насочени кон наоѓање решение за името“, потенцираше Нимиц.

Посредникот од ОН и во Грција настапил со пооптимистички став и, како што пренесуваат грчките новински агенции, речиси е сигурен дека ќе се најде решение за името. Според него, и двете страни сакаат да ги подобрат заемните односи. „Знам дека Владата во Скопје сака да се најде решение за проблемот, со цел да се подобрат односите со Грција“, е ставот на Нимиц, кој информираше дека на средбата Бакојани рекла оти сака да се подобрат односите со северниот сосед на начин кој ќе биде достоинствен и праведен. „Постои силна волја за решавање на проблемот и од двете страни и се надевам дека во оваа насока се и идеите и предлозите кои ги дадов. Се надевам дека и двете страни сериозно ќе размислат за тоа“, изјави Нимиц.

Посредникот Нимиц во Атина информираше дека сега ќе почека Атина и Скопје да ги разгледаат неговите идеи, за што и од двете страни било побарано дополнително време, и оти тој ќе биде во контакт со нив. „Ги охрабрувам двете страни да продолжат со преговарачкиот процес, што би значело одделни средби или една заедничка средба на двете страни“, изјави Нимиц.

По средбата со Бакојани вчера посредникот одржал и 50-минутна средба и со лидерот на главната грчката опозициона партија ПАСОК, Јоргос Папандреу, која бара одржување на предвремени избори во Грција во септември. По средбата со Папандреу, Нимиц изјавил дека не разговарал со Папандреу за предлогот, бидејќи тоа би значело кршење на протоколот. Без изнесување повеќе детали за тоа што било разговарано на средбата со Папандреу, Нимиц само изјави дека тоа бил „добар разговор“. Папандреу и Бакојани вчера два пати се обидоа да се сретнат и да разговараат за средбите со Нимиц, но поради работните обврски состанокот го одложиле за подоцна во денот или за денеска, пренесуваат грчките медиуми.