Странските државјанства како спас од прогонот
Ексминистерот Владо Димов го спаси бугарскиот пасош, а српските документи ексцариникот Драган Даравелски
Ексминистерот за здравство Владо Димов по два часа поминати пред истражен судија, завчера од судот во Варшава замина како слободен човек. Со бугарскиот пасош и личната карта која му е издадена во Софија, тој веќе денеска може да се врати на работното место раководител на дигестивниот оддел на клиниката Токуда во Софија, каде што работи изминатава година.
Судските органи во Варшава не се одѕваа на барањето на македонската полиција, која распиша потерница за Димов, поради истрага за злоупотреба на 40 илјади евра. Засега е нејасно дали Димов го спаси бугарскиот пасош или, пак, тоа што станува збор за полесно кривично дело за кое е предвидена казна затвор до три години.
Македонската полиција добила известување на Варшава, но тоа било штуро и без објаснување зошто Димов е ослободен. „Ќе бараме дополнително објаснување за ваквата одлука, а ќе го известиме и Министерството за правда“, вели Иво Котевски од МВР.
Димов беше уапсен во понеделникот на аеродромот во Варшава, при обидот да лета за Софија. Тој веќе неколку години е надвор од земјава и работи на угледни европски клиники, додека полицијата и даночниците го стегаа обрачот околу него.
Од полицијата најавуваат дека и понатаму останува активна меѓународната потерница која што е распишана против него во март годинава. Тој се бара по наредба на истражниот судија од Струмица за истрага за незаконски вработувања во Здравствен дом во текот на 2005 година, додека бил министер за здравство, при што бил оштетен Буџетот за 2,5 милиони денари.
Со оглед на тоа дека Димов има бугарски пасош веќе две години, се' поизвесно е дека Бугарија нема да дозволи екстра��иција на сопствениот државјанин, со што македонските власти стануваат немоќни.
„Финтата“ со вадење на странски државјанства, со цел да се избегнат македонските судови е често применувана пракса во земјава. Македонија со години наназад не успева да обезбеди екстрадиција на најбараниот бизнисмен Драган Даравелски, кој замина во Србија. На страницата на МВР се' уште е активна потерницата по него, но неговиот српски пасош е помоќен од сите инсистирања тој да биде предаден во земјава.
Ексдиректорот на Царинската управа, со српското државјанство ја ескивира пресудата од седум години затвор поради злоупотреба на службената должност и овластување, со што била оштетена државата за 2,5 милиони евра. Пресудата беше потврдена од Апелациониот суд, но се уште не поминала низ филтерот на врховните судии. На Даравелски му се судеше во отсуство, бидејќи српските власти одбиваат да го испорачаат кумановецот.
Еден од ретките кој не го спаси странското државјанство е Методија Смиленски. Поради повеќе обвиненија за злоупотреби, бизнисменот со австриско државјанство пред две години со силно полициско обезбедување од Србија беше екстрадиран од Србија во земјава. Против него се водеа повеќе постапки во скопскиот, штипскиот и светиниколскиот суд, од кои дел завршија со судски пресуди, а некои се уште се во тек. (Д.Т.) |
