Си-Ен-Ен го вброи „Егзит“ меѓу најдобрите фестивали
Популарниот музички фестивал „Егзит“ се најде меѓу деветте најдобри фестивали во светот, според листата што ја состави Си-Ен-Ен. Покрај фестивалот што се одржува секоја година на Петроварадинската тврдина во Нови Сад, се најдоа и британските „Глостонбери“ и „Бестивал“, данскиот „Роскилде“, американските „Бунару“, „Пичфорк“ и „Самерфест“, австрискиот „Парклајф“ и јапонскиот „Фуџи рок“.
Интернационалното издание на Си-Ен-Ен - CNN World Fiesta потенцира дека „Егзит“ се обраќа на мошне разновидна публика, промовирајќи различни музички правци и стилови од бендови како што се „Портисхед“ и „Палп“, до електронски состави како што се „Андерворлд“, „Џамирокваи“ и други. Во текстот уште се додава и дека влезниците за „Егзит“ во просек се двојно поевтини од оние на останатите фестивали и токму затоа Нови Сад претставува популарна дестинација за младите од целиот свет. Авторот Ник Томпсон објаснува и дека фестивалската сезона започнува веќе во јуни и до септември речиси секој викенд е исполнет со некое музичко случување низ светот. |
