Санадер збриша од Хрватска пред да биде уапсен

Бившиот хрватски премиер заминал кон Словенија неколку часа пред да му биде одземен пратеничкиот имунитетот

Горан Адамовски


Поранешниот хрватски премиер, Иво Санадер, побегна од земјата само неколку часа откако Државното обвинителство побара да му биде одземен пратеничкиот имунитет и да биде уапсен. Преку преминот Брегана Санадер заедно со ќерка си најлегално заминал за Словенија. Од тамошното МВР информираат дека морале да го пуштат да си замине, бидејќи во тие моменти немале зошто да го задржат, имајќи предвид дека дотогаш не била издадена наредба за апсење. Експретседателот на владејачката ХДЗ беше споменуван во многу афери, а врз која основа вчера се побара негово апсење - се чуваше како државна тајна. Медиумите објавија дека станува збор за негово учество во аферата „Фими-медија“, за што директорката Невенка Јурак е во притвор од август годинава.

Драмата започна вчераутро кога Државното обвинителство на Хрватска испрати барање до Саборот да му го одземе пратеничкиот имунитет на Санадер, а наедно и побара негово апсење. Седницата на мандатно-имунитетна комисија во Саборот, која едногласно изгласа одземање на пратеничкиот имунитет на Санадер, се очекуваше околу 14,30 часот, а хрватските медиуми веќе се стационираа пред домот на експермиерот очекувајќи го неговото апсење.

Санадер, чии соработници во изминативе денови и месеци беа осудени во различни судски процеси, не чекајќи ја полицијата на куќната врата, околу 11 часот преку граничниот премин Брегане, оддалечен десетина километри од Загреб, замина за Словенија.

„Не можевме да го задржиме, немавме никаква основа за тоа“, се правдаа од хрватското МВР.

Според шпекулациите на загрепските весници, Санадер ќе се крие во Австрија и преку своето австриско државјанство ќе се надева дека нема да заврши во најголемиот хрватски затвор „Реметинец“.

Санадер, пак, се огласи вчера попладне, тврдејќи дека е на службен пат и дека ќе се врати кога ќе биде повикан од Одделението за организиран криминал.

За кој случај Обвинителството има докази, официјално не се потврдува, бидејќи станува збор за таен документ. Сепак, медиумите веќе објавија дека во прашање е аферата „Фими-медија“. Оваа фирма регистрирана во 2001 година со еден вработен и околу 100.000 евра приход, израсна во фирма со 11 вработени и 120 милиони евра приход во 2009 година.

„Поголемиот дел од нив ги остварила токму преку државните фирми, кои и' ги повериле своите кампањи на оваа фирма“, пишуваат медиумите.

Бегството на Санадер ја шокираше целата земја. Тој долго време беше во САД, но есенва се врати во Хрватска, а тогаш, на прашањето на новинарите дали се плаши од апсење - одговори со „не“

Неговите акции паднаа лани кога од необјаснети причини се повлече од премиерската функција. На негово место дојде Јадранка Косор, која најави бескомпромисна борба против корупцијата поради што набргу се конфронтираше со нејзиниот претходник.