Судот го спаси исказот на заштитениот сведок
Луѓето задолжени за одржување на компјутерскиот систем во Основниот суд Скопје 1 успеале да го спасат исказот, кој, во вторникот, го дал заштитениот сведок во судската постапка што се води за обвинетите во случајот „Метастаза“. Како што потврдуваат од кривичниот суд, исказот е обезбеден и затоа не ќе има потреба овој сведок да се појавува уште еднаш пред Судечкиот совет за да го повтори она што веќе го кажал.
Курцшлусот, како што пишувавме, се случил во понеделникот кога поради дефект на компјутерот, постоеше стравување дека не е снимен исказот што го дал заштитениот сведок пред судот. Сепак, проблемот бил решен и сведокот не ќе мора повторно да дава исказ за случајот со издавање инвалидски пензии врз база на лажни дијагнози. Од судот ве��ат дека не е прв пат да дојде до пад на системот, но досега не се случило никому од судиите да му недостигаат искази на обвинети, сведоци или некој друг доказ во предмет.
Повеќе од 40 лица, обвинети во случајот „Метастаза“, се товарат за посредување при обезбедување лажни дијагнози за инвалидски пензии. Меѓу обвинетите се и првостепената и второстепената лекарска комисија, но и голем број лекари-специјалисти. (Љ.С.) |
