ЛИНДЗИ ЛОХАН

Отпуштена среде снимање

На глумицата Линдзи Лохан во последно време ништо не и' оди од рака. Освен што има финансиски проблеми, пред извесен период татко и' и' доведе полиција на врата, а сега се рашири веста дека Ли-Ло е отпуштена од снимањето на новиот филм.

Проблематичната актерка требаше да го отелотвори ликот на студентка, која работи на еден напуштен остров во филмот „Другата страна“, но продуцентите, како што тврдат изворите, одлучиле да ја отпуштат Линдзи, затоа што нејзиното име не било вистинската гаранција за успехот на проектот. Сценаристот и режисер на филмот, Дејвид Мајклс, беше особено дипломатичен кога објаснуваше зошто повеќе не соработуваат со Линдзи. „Нашиот тим едноставно направи чекор повеќе од Лохан. На филмот повеќе ја нема, а наскоро ќе се објави и актерката која ќе ја замени“, рече Мајклс. Во филмот ќе глумат и Вуди Харелсон, Џовани Рибиси и пејачката Аланис Морисет.

Улогата која Ли-Ло требаше да ја одигра во првичниот план беше наменета за Британи Марфи, која почина од воспаление на белите дробови минатата година. Линдзи се нема појавено во добар филм уште од 2006 година, кога критиката го пофали проектот „Боби“, а добро заработи и на киноблагајните. Нејзиниот последен филм „Знам дека ме уби“ од 2007 година беше едно големо фијаско.