Под концесија за автопат ќе се дадат седум делници
Седум делници, на кои е предвидена изградба на автопат во повеќе делови од државата со вкупна должина од 560 километри, ќе бидат дадени под концесија на приватни инвеститори. Потенцијалните концесионери по изградбата на автопатите ќе можат да стопанисуваат со нив и да наплатуваат патарини. Во Министерството за транспорт и врски велат дека бројот на патарините и цената ќе биде утврдена со Законот за јавни патишта. Вкупната инвестиција е 2,4 милијарди евра. Во понудата на Владата за концесија се делниците од Романовце до Деве Баир со должина од 70 километри, од заобиколницата на Скопје до граничниот премин со Косово - Блаце во должина од 13 километри, од Гостивар до охридскиот аеродром 93 километри, од границата со Албанија до Битола 85 километри, од Меџитлија до Велес 130 километри и од Велес до границата со Бугарија 120 километри и последната делница од Штип до Миладоновци со должина од 49 километри.
Првата фаза на проектот на Владата за унапредување на патната инфраструктура почна пред два дена, со објава на повик до заинтересираните фирми во домашни медиуми и во „Фајненшел тајмс“ и во „Економист“. Рокот за поднесување на документацијата е 15 август, а успешните понудувачи ќе учествуваат на ограничен јавен повик.
Рокот на концесионирање ќе биде утврден во втората фаза од проектот и ќе зависи од степенот на заинтересираност на компаниите. Потенцијалните концесионери ќе добијат и рок во кој ќе треба да ја завршат инвестицијата.
Тие ќе треба да изработат главен проект со анализа за влијанието на животната средина и за структурата на финансирање на проектот. За времетраењето на концесијата, концесионерот треба да се грижи за одржувањето на делницата. (С.Н.) |
