Словенците на референдум за членство на Хрватска во НАТО
Словенечките националисти ја уценуваат Хрватска
ЗАГРЕБ - Вонпарламентарната партија Партија на словенечкиот народ (ПСН) вчеравечер најави дека ќе продолжи со активностите поврзани за распишување референдум за влез на Хрватска во НАТО. „Би се откажале од распишување референдум кога словенечкиот парламент би го дополнил своето соопштение дека Хрватска мора да го отстрани граничниот премин Плованија, како и надзорната точка во Хотиз“, изјави доцна прексиноќа за државната словенечка телевизија претседателот на партијата, Зденко Винков Винценц, додавајќи дека ќе се сретне со премиерот Борут Пахор.
Првиот човек на ПСН најави дека ќе продолжат активностите за распишување референдум без оглед на одлуката на словенечкиот парламент, кој прексиноќа на вонредната седница го прифати проширеното соопштение за заштита на словенечките национални интереси во рамките на хрватските настојувања за полноправно членство во НАТО. За него тоа соопштение не е задоволувачко, иако во него се споменува дека владите на Словенија и на Хрватска со Брионскиот договор се обврзаа дека ќе ја почитуваат состојбата на границата од 25 јуни 1991 година.
Марјан Подобник, претседател на Здружението „Завод 25 јуни 1991“, кој вчера и официјално се откажа од организирање референдум, бараше од словенечкиот парламент да излезе со соопштение во кое би пишувало дека на Словенија и' припаѓа целиот Пирански Залив, излез на отворено море и дека се дел од нејзините територии и спорните атари јужно од Драгоња, а исто така и спорните територии по должината на реката Мура. Иако Подобник наводно сношти не бил задоволен со соопштението, се одлучил да се повлече.
Соопштението на нож беше пречекано во Загреб, каде што хрватското Министерство за надворешни работи и европски интеграции негодуваше поради словенечкото прејудицирање на линијата на разграничување со Хрватска. „Наводите изнесени во официјалното соопштение на највисокото законодавно тело на Словенија ги отфрламе, ги сметаме за невистинити, правно неосновани и без никаков меѓународно-правен ефект. Така изнесените ставови на словенечкиот парламент не оставаат простор за решавање на хрватско-словенечкиот граничен спор низ конструктивен дијалог и со тоа го потврдуваат оправданото настојување на Хрватска тоа прашање да се реши пред Меѓународниот суд на правдата во Хаг, како што беше договорено на состанокот на претседателите на владите на Хрватска и на Словенија во август 2007 година на Блед“. (Вијести.нет)
Словенечките националисти ја уценуваат Хрватска
ЉУБЉАНА - Словенечките законодавци во средата одржаа вонредна седница во обид да ги сопрат плановите на националистичката група да го опструира приемот на соседот Хрватска во НАТО. Алијансата планира да ги прими Хрватска и Албанија на самитот што ќе се одржи на 3 и 4 април. Сите 26 членки на Северноатлантската воена алијанса ја ратификуваа кандидатурата на Хрватска, но само Словенија се' уште ја нема доставено конфирмацијата до НАТО. Сега Народната партија, која има пет пратеници во 90-члениот парламент, поведе процедура за одржување референдум за кандидатурата на Хрватска. Ако таа не се откаже од барањето, ќе има 35 дена да собере 40.000 потписи, колку што се потребни за да се распише референдум. Тоа ќе ја задржи ратификацијата на Словенија и по крајниот рок за доставување до НАТО и ќе ја спречи Хрватска да влезе во Алијансата на следниот самит, без разлика дали ќе се одржи или не референдум.
Владејачката партија сега планира да излезе со решение за односите меѓу Хрватска и Словенија во надеж да се убеди Народната партија да се откаже од плановите за референдум. Соседите Словенија и Хрватска со години се спорат околу неколку точки на нивната граница. Народната партија сака парламентот да прогласи дека сите спорни области и' припаѓаат на Словенија, изјава што владата и најголемата опозициона партија мала е веројатноста дека ќе ја прифатат, бидејќи ќе ги уништи сите преговори со Хрватска.
Словенија минатиот месец ги блокираше преговорите на Хрватска за членство во ЕУ, барајќи прво да го решат граничниот спор. Портпаролот на НАТО, Џејмс Апатурај, во вторникот пред хрватските и словенечките новинари изјави дека Алијансата е „загрижена“ од можноста дека словенечката ратификација нема да стигне навреме за самитот. Премиерот Борут Пахор во вторникот инсистираше на тоа дека Словенија сака Хрватска да влезе во НАТО.
Министерот за надворешни работи, Самуел Збогар, призна дека земјите-членки на НАТО „малку нервозно“ ги следат настаните во Словенија. (АП) |
