Економијата во третиот квартал порасна за 5,5 отсто
Неизвесно е каков БДП ќе има на крајот на 2008 година поради крахот на металските фирми
Маја Томиќ
Последните статистички податоци покажаа раст на бруто-домашниот производ од 5,5 отсто во третиот квартал од годинава, во споредба со истиот период лани. Растот, всушност, ја отсликува состојбата во економските движења во јули, август и септември пред да се почувствуваат последиците од светската економска криза. Неизвесно е што ќе покажат завршните статистички анализи за БДП од последните три месеци годинава, ако се има предвид дека металургиските компании и рудниците се затворени или работат со мал капацитет, поради падот на цената на металите на берзите, а илјадници вработени се на принуден одмор.
Она што е посебно значајно е што токму металскиот сектор учествува во градењето на вкупниот БДП со околу 12 отсто, така што податоците за последниот квартал од 2008 година, кои би требало да се објават во март в година, можат да бидат поразителни за македонската економија. Државниот завод за статистика објави дека врз порастот на БДП од 5,5 отсто, најмногу влијаел растот од 10,6 отсто во три сектори, во преработувачката индустрија, вадењето руди и камен и во снабдувањето со електрична енергија. Инаку, во првото тримесечје Македонија забележа раст на БДП од 5,3 отсто, а во второто од 6,2 отсто, во споредба со истите периоди лани.
Но, многу полоши резултати се очекуваат за идната година. „Според нашите проекции, БДП во наредната година нема да биде повисок од 3 отсто, односно ќе се движи меѓу 2,5 и 3 проценти“, вели Марјан Николов од Центарот за економски анализи. Тој посочува дека растот на БДП во наредната година ќе биде неизвесен, затоа што во голема мера ќе зависи од текот на кризата и движењата на светската економија, која со себе носи големи ризици.
Вицепремиерот Зоран Ставрески вчера изјави дека македонската економија ќе претрпи сериозни последици од кризата, а Владата ги разгледува сите понудени мерки. „Ќе бараме нови решенија доколку овие што ги понудивме не се доволни да се ублажат последиците“, изјави Ставрески.
Премиерот Никола Груевски завчера изјави дека иако за идната година Македонија проектирала раст од 5,5 отсто, таа прогноза најверојатно нема да се успее да се оствари, поради кризата која го зафати и реалниот сектор. Тој нагласи дека на македонските граѓани треба да им се каже вистината околу кризата, иако само неколку дена претходно премиерот тврдеше дека в година ќе се оствари раст од 5,5 проценти. И премиерот не ја исклучува можноста Владата да пр��дложи нови мерки за кризата.
Во третото тримесечје од годинава бројот на вработените во земјава се зголемил за 3,6 отсто во споредба со истиот период лани, а невработени имало за 1,9 проценти помалку. |
