„Вијагра“ слави десет години
За 10 години, откако беше откриена „вијаграта“ или уште попозната како синиот дијамант, со неа се лекувале околу 30 милиони мажи во светот, кои имале проблем со ерекцијата. Сината таблета е прв лек на избор при третманот на еректилната дисфункција и досега се препишани околу 150 милиони таблети. Во нашата земја годишно се трошат околу 30.000 кутичиња „вијагра“, која на нашиот пазар пред девет години ја донесе „Алкалоид“.
„Оваа бројка укажува дека кај нас е разбиена табу- темата за проблемите со ерекцијата“, вели урологот Љупчо Лекоски, посебно што еректилната дисфункција не е само проблем на мажите над 65 години, туку ги засега речиси половината од мажите кога ќе ја поминат 40. година. Притоа, треба да се дефинира дали за еректилната дисфункција причината е психогена или, пак, последица на органски нарушувања, па и болестите како дијабетесот и покачениот крвен притисок.
Д-р Никола Лабачевски, пак, укажа дека овој лек не смее да го земат момчиња под 18 години. Досега во Центарот за несакани дејства во Скопје нема пријавен случај на несакани ефекти од „вијаграта“. (Ј.Ј.) |
