Кина постави споменик, па го урна

ПЕКИНГ - Официјални претставници од североисточна Кина уништиле споменик на јапонските имигранти за да ги смират негодувањата на јавноста поради неговата изградба во јули, јавија вчера државните медиуми, што е знак за преостанатото антијапонско расположение во регионот, што некогаш беше окупиран од Јапонија. На ѕидот-споменик со висина од 3,8 метри беа испишани имињата на 229 јапонски имигранти, кои беа дел од илјадниците населени во провинцијата Хеилонгџијанг од јапонската влада за време на окупацијата од Втората светска војна.

Претставникот изјави дека споменикот за имигрантите, кои починаа од глад по предавањето на Јапонија, беше обележје за хуманоста на кинескиот народ.

Но, жителите од округот Фангженг каде што беше поставен споменикот ги критикуваа офиц��јалните лица дека залудно потрошиле јавни средства за комеморација на освојувачите, пишува официјалниот весник на англиски јазик „Чајна дејли“. Минатата недела петмина мажи од цела Кина отпатуваа во провинцијата за да го урнат ѕидот со чекани и го испрскаа со црвена боја, што е јавен израз на незадоволство поради кое властите беа принудени да го урнат споменикот во петокот ноќта.

Милиони кинески војници и цивили загинаа во војната и под бруталната јапонска окупација во делови од Кина од 1931 до 1945 година, што остави огорченост која понекогаш се' уште ги попречува официјалните односи. (Ројтерс)