Уште еден хеликоптер на НАТО падна во Авганистан

КАБУЛ - Хеликоптер на НАТО вчера се урна во источниот дел на Авганистан, но, наводно, нема жртви, јавуваат официјални лица, што е уште едно грубо потсетување за опасностите од војната, откако 38 лица загинаа во воздушен инцидент, односно најголемата поединечна загуба на странските сили за 10 години. Загрижувачкиот пораст на воените смртни случаи се совпаѓа со рекордниот број жртви меѓу цивилите, кои и натаму го издржуваат најголемиот удар од војната, што се чини дека заглави и покрај тврдењата дека е постигнат успех од двете страни.

Околу триста гневни Авганистанци вчера излегоа на улиците во централната провинција Газни, носејќи ги телата на двајца луѓе за кои тврдеа дека биле убиени во напад на единиците на ИСАФ. Цивилните жртви од странски војници, кои се во потрага по бунтовници, одамна се голем извор на недоразбирање меѓу Кабул и неговите поддржувачи од Запад. Податоците на ОН покажуваат дека бројот на жртвите достигна рекордно ниво во првите шест месеци од 2011 година, иако за 80 отсто од нив се обвинуваат бунтовниците.

Официјални претставници на НАТО се' уште ја истражуваат причината за хеликоптерската несреќа пред два дена, во која загинаа 38 луѓе, меѓу кои 30 американски војници - некои од специјалните сили на морнарицата, тимот „фоки 6“ од кои беше убиен Осама бин Ладен - седуммина Авганистанци и еден преведувач.

Талибанците тврдат дека собориле хеликоптер „чинук“ ЦХ-47 во централната провинција Мајдан Вердак, а американски претставник во Вашингтон, кој побара да остане анонимен, јави дека хеликоптерот, најверојатно, бил соборен. Портпаролот на талибанците, Забихула Муџахид, тврдеше во текстот испратен до Ројтерс дека исламската група го соборила хеликоптерот, друг „чинук“ во местото Зурмат во Пактија, при што загинале 33 американски војници.

Порастот на бројот на жртвите - најмалку 38 странски војници се убиени оваа година досега, од кои речиси 50 во првата недела од август - доаѓа во време на се' поголема вознемиреност поради се' понепопуларната и скапа војна. (Ројтерс)