ЕПП - битка за македонското прашање

Група интелектуалци апелираат до европските авторитети да помогнат за разумен компромис со Грција

Александра М.Митевска


Писмата од премиерот Никола Груевски и од министрите за евроинтеграции и за надворешни работи, Васко Наумовски и Антонио Милошоски нема да бидат единствените што ќе се најдат на бироата на европските авторитети пред заседанието на Европскиот совет.

Група интелектуалци од Македонија деновиве ќе се обратат до надлежните функционери во ЕК и до шефовите на држави, влади и дипломатии на земјите-членки на ЕУ со апел да се спречи „разнебитувањето на македонскиот народ и на неговата држава“. Единствено, властите во Атина ќе немаат можност да го прочитаат апелот во кој се сугерира Грција да ја почитува Привремената спогодба, бидејќи нејзиното натамошно игнорирање „значи прекинување на процесот на посредување и барање решение, кое би ја загрозило безбедноста на регионот“.

Апелот, адресиран до „сите мирољубиви, демократски, прогресивни и добронамерни поединци и сили во светот“, вчера беше објавен во „Нова Македонија“, заедно со формулар што можат да го потпишат оние што се согласуваат со наводите во него. А, таму се наведува дека Македонија е изложена на силен меѓународен притисок да го смени уставното име, со кое се гордеела веќе 65 години, дека се врши геноцид врз македонскиот народ кој е пред присилно истребување, дека Македонците ќе останат без национален идентитет и историски континуитет ако се прекрсти нашата држава...

Меѓу потписниците се и двајца советници на претседателот Ѓорге Иванов - амбасадорите Димитар Мирчев и Ристо Никовски. Во апелот дури и фигурира терминот „разумен компромис“, кој беше препознатлив во предизборните настапи на Иванов. Меѓутоа, Никовски е категоричен дека станува збор за граѓанска и натпартиска иницијатива, кон која веќе се приклучиле педесетина интелектуалци, кои настапуваат во лично име. Никовски деновиве планира да испрати писмо и до влијателните светски медиуми, со цел да му се даде гласност на македонското прашање.

Апелот го потпишале и директорот на институтот „Евро-балкан“, Јован Донев, академик Блаже Ристовски, универзитетскиот професор Ферид Мухиќ, потоа Ефтим Клетников, Таки Џиков, Игор Јанев, Горазд Росоклија ...

Главно, станува збор за личности што настапувале со тврди ставови во однос на компромисот со Грција. Донев, на пример, подолго време се залага за прекинување на преговорите, бидејќи, по ветото во Букурешт, Македонија веќе немала спор, туку конфликт со Грција. Никовски пред неколку месеци ја разбранува јавноста кога предложи државата да се преименува во Република Македонија (Вардар), бидејќи со придавките „горна“ или „северна“ ќе се разнебител македонскиот народ. Мирчев, пак, во една неодамнешна колумна напиша дека власта има „многу убава стратегија - да не ни се случи да го затрат црното семе!“ Според него, „може на таа стратегија да се додаде по нешто. На пример, во оваа ситуација, да и' се обратиме на ООН и да изјавиме дека засега разговорите се бесполезни“.

Потписниците на апелот, меѓу другото, предупредуваат да не се дозволи да се прекршат фундаментите на слободата и на демократијата, бидејќи „македонскиот народ не бара ништо што не е придобивка за сите народи и држави“.

По игра на случајот, вчера во дневниот печат беше објавена и една поинаква декларација со која се укажува дека внатре во државата е загрозена слободата на поединецот, поради зачестените вербални напади врз оние што настапуваат со идеи различни од политиките на власта.

Декларацијата, иницирана од „Граѓани за европска Македонија“ ја поддржале повеќемина професори, новинари, претставници на НВО-секторот... Таа можеби нема да се најде на масите на европските лидери - во клучен период за меѓународното позиционирање на државата. Сепак, во оваа декларација јасно се укажува дека власта се обидува да го амортизира секое струполување на македонските позиции на меѓународен план однатре поттикнувајќи лов на вештерки, предавници и внатрешни непријатели.

„Уште еднаш, исто како пред Букурешт и по него, ни се случува повнатрешнување на деструкцијата, сведување на јавниот говор на бруталност, постојано ширење говор на омраза, етикетирање и барање непријатели“, се вели во декларацијата.