Јагода Михајловска-Георгиева:

Имам книги „љубови за сите времиња“

Најчесто паралелно читам по неколку книги, а во моментов одвај две. Обете се збирки раскази: „Мобилен“ од германскиот писател Инго Шулце (издание „Блесок“) и „Две перници“ од Оливера Ќорвезировска. Вторава наскоро ќе биде објавена од „Три“ и имав привилегија да ја „ѕирнам на парче“ во ракопис. Краткиот расказ ми е голема љубов, и за читање, и за пишување. А, збирките на Шулце и Ќорвезировска ми ја возвратија љубовта, што ме прави радосна како да сум добила скапоцен подарок...Па, и сум добила.

Читањето веќе од��мна не го „водам под фајлот“ - желба. Најблиску ми е да го споредам со дишењето, или пиењето вода. А, навиката за читање ја носам, изгледа преку гените. Моите дома, баба ми, дедо ми, родителите, сите беа читачи и расказувачи, поети и анонимни писатели. Во раното детство и младост не читав, ги голтав книгите сосе коски. Сега сум повнимателна.

Имам книги „љубови за сите времиња“. Ги препрочитувам и ги препорачувам каде стигнам. Еве неколку од нив: збирките раскази „Продавница на тајни“ од Д.Буцати, „Премногу често заминуваш во Хајделберг" од Х. Бел, романот „Богот на малите нешта“ од Арундати Рој, сите, без исклучок сите дела на Маргерит Дирас, „Малиот принц“ од Егзипери...