Поскапо лекување во болница?

Партиципацијата може да се зголеми до 50 отсто

Јасмина Јовановска

Здравствените власти размислуваат да ја зголемат партиципацијата, со што пациентите ќе учествуваат со повеќе пари во цената на здравствени услуги за лекување во болница и во клиника. Овој предлог се подготвува во Министерството за здравство и со него се предвидува партиципацијата да се зголеми и до 50 отсто за одредени медицински третмани.

Така, за лекување на забите во специјалистичка установа или клиника, како што дознаваме, се предлага пациентите да плаќаат и до 50 отсто партиципација. Слично учество се предлага и за медицинските помагала, додека за медицинската рехабилитација се размислува за тоа болниот да учествува со 30 отсто.

Овие партиципации се дел од новата скалеста партиципација за секундарно и за терциерно здравство на која работи заедничка група од Министерството и од Фондот за здравство и која, според неофицијални информации, како предлог до Владата треба да дојде најдоцна до 15 јули.

Предлогот, кој е многу близок до хрватскиот модел, предвидува партиципацијата за болнички и за клинички услуги да се подели во неколку категории и пакети според тоа дали услугите се на ниво на болница или на клиника, како и според вредноста на услугата, слично на скалестата партиципација што сега ја има во болниците и за лековите.
Разликата меѓу цената што ја покрива Фондот и полната цена на услугата, како и досега, ќе ја плаќа пациентот или, пак, ќе биде покриено со дополнителното здравствено осигурување, кое ќе биде новина.

Ова значи дека зголемената партиципација пациентите ќе ја плаќаат од свој џеб или со дополнително осигурување што, секако, ќе биде дополнителен трошок за осигурениците, кои покрај редовниот здравствен придонес ќе плаќаат и за осигурување.

Според доброупатени извори, здравствените власти се одлучиле за зголемување на партиципацијата за да се избегне кратењето на основниот пакет здравствени услуги, што беше првична солуција. Но, според овие извори, зголемувањето на партиципацијата сигурно е дополнителна мерка за спас на Фондот за здравствено осигурување од финансиската криза во која западна.

Во Министерството за здравство потврдуваат дека работат на измените на парти��ипацијата и пакетот на здравствени услуги и оти во игра се повеќе предлог-решенија, но не сакаат да ги откријат додека не се дефинираат. И министерот за здравство Бујар Османи не сакаше да открие детали од измените, но потврди дека веќе една година се размислува за тоа прашање и се разгледуваат повеќе различни модели. „Во моментов кај нас сите здравствени услуги се опфатени, вклучително и лекување во странство. Нема земја во светот која може да ги покрие сите здравствени услуги за сите. Тоа е проблем со кој ќе мора да се соочи државата. Тоа го направија земјите во регионот, Словенија, Хрватска, па мора и ние“, посочи Османи и додаде дека ова прашање треба да се реши со консензус.

Засега не се открива по кој модел ќе се ревидираат пакетот и партиципацијата, но како пример Османи го посочи хрватскиот модел, според кој, здравствените услуги се групирани во категории и според тоа во која припаѓаат тие, целосно или делумно, се покриваат од Фондот за здравство. Па, така има група услуги што Фондот ги покрива со 85 отсто, со 70 отсто, со 65 отсто. Разликата до полната цена на услугата ја плаќа пациентот или, пак, дополнителното здравствено осигурување.

И во Фондот за здравствено осигурување не беа расположени за откривање детали, но велат дека скалестата партиципација за болнички услуги ќе почне да се применува откако ќе се воведе дополнителното здравствено осигурување. (Ј.Ј.)