Хуманитарците на прегледи во Истанбул

Тројцата македонски хуманитарци што беа дел од конвојот со помош за населението во Газа, што беше нападнат од израелската армија, најверојатно, денеска ќе пристигнат во земјава. Тие вчераутро околу 3,30 часот пристигнаа во Истанбул, каде што беа подложени на здравствени прегледи, а беше направен и записник за предметите што им биле одземени од израелските власти.

Скопјаните Јасмин Реџепи (28) и Сами Емини (57), како и Сеад Хасипи (50) од Куманово заедно со околу 500 луѓе од хуманитарниот конвој со авиони беа депортирани од Тел Авив. Нашите државјани во Истанбул беа пречекани од македонскиот конзул Зерин Абас. Откако ќе им бидат извршени лекарските прегледи, тие ќе летнат за Македонија. Авиобилетите со отворен датум за Скопје се обезбедени од хуманитарната организација ИХХ преку која заминаа за Газа.

Израел до крајот на вчерашниот ден требаше да ги депортира сите активисти од хуманитираниот конвој, составен од шест брода, кои носеа помош за појасот Газа.

Сите активистите се одведени на аеродромот „Бен гурион“ во Тел Авив, од каде што ќе бидат упатени во нивните земји. Израелската армија во понеделникот наутро изврши десант со хеликоптери врз шесте брода натоварени со десет илјади тони храна, лекови и градежен материјал, при што беа убиени 9 лица. Уапсени беа вкупно 670 активисти, кои беа притворени во градот Бер Шева. Тие беа пуштени откако потпишале барање за депортација во матичната земја, во кое потврдуваат дека нелегално влегле во Израел. (Г.А.)