Тајландскиот премиер доби забрана за занимавање со политика
Уставниот суд донесе и одлука за распуштање на партијата на премиерот Вонгсават
БАНГКОК - На тајландскиот премиер Сомчаи Вонгсават му е забрането да се занимава со политика во следните пет години, а неговата партија вчера беше распуштена, вовлекувајќи ја земјата во подлабок хаос и зголемувајќи ги стравувањата од насилни реакции од страна на поддржувачите на власта. Партиските членови ветија дека „ќе продолжат понатаму“ и ќе формираат друга влада во почетокот на следниот месец. „Сите ќе се преселиме во нова партија, Пуеа таи, и ќе бараме гласање за нов премиер на 8 декември“, изјави Џатупорн Промпан, парламентарец од редовите на ППП за Ројтерс.
Уставниот суд, исто така, донесе одлука за распуштање на две други партии од шестпартитната коалиција на Сомчаи поради изборни нерегуларности на изборите што се одржаа во 2007 година и им забрани на нивните лидери пет години да се занимаваат со политика. Судската одлука го зголеми ризикот од избивање судири меѓу владините сојузници облечени во црвени кошули, кои се собраа пред судот кога беше прочитана судската одлука, и илјадници антивладини демонстранти, облечени во жолти кошули, кои ги блокираа двата аеродрома во главниот град.
Неколку часови пред донесувањето на судската одлука, едно лице беше убиено, а 22 повредени по истрелувањето граната кон демонстрантите кои го зазедоа домашниот аеродром „Дон Муанг“. Веднаш немаше реакција на судската одлука од Народната алијанса за демократија (ПАД), чии симпатизери извршија инвазија врз двата главни аеродрома во Бангкок кон крајот на минатата недела во „финалната битка“ за соборување на Сомчаи. ПАД одби да преговара додека Сомчаи не си замине. Тие го обвинуваат Сомчаи дека е марионета на својот зет, соборениот премиер Таксин Шинаватра.
Околу 250.000 странски туристи се оставени на цедило од еднонеделното мирно заземање на аеродромот „Дон Муанг“ и на поголемиот меѓународен аеродром „Суварнабуми“. Воздушната каргоиндустрија речиси целосно е приземјена, што ја чини земјата стотици милиони долари. (Ројтерс) |
