Металург и Вардар про чекаат ривали

Двете најдобри машки ракометни екипи во Македонија, првакот Металург и вицешампионот Вардар про, денеска ќе чекаат абер од Виена, каде што во 11 ч. ќе почне извлекувањето на двојките за осминафиналето во еврокуповите.

Покрај „металурзите“, третото коло во Купот на ЕХФ успешно го поминаа и: Брегенц од Австрија, Силкеборг и Нордсјиланд од Данска, Натурхаус ла Риоха и Реале Адемар од Шпанија, Сан Рафаел од Франција, Гепинген, Лемго и Гросвалштат од Германија, Татабања од Унгарија, Порто од Португалија, Краснодар од Русија, Горење од Словенија, Амичиција од Швајцарија и Бешикташ од Турција.

Освен вардарци, пак, третата пречка во Купот на куп-победниците ја прескокнаа: Кремс од Австрија, Извиѓач од БиХ, Копенхаген од Данска, Сан Антонио од Шпанија, Трембле од Франција, Гумерзбах од Германија, Балатонфиреди од Унгарија, Елверум од Норвешка, Чико од Португалија, Решица од Романија, Каустик од Русија, Браник од Словенија, Колубара од Србија, Халмстад од Шведска и Будивелник од Украина. (Р.Д.)