Грчка шопинг инвазија на Бугарија

Тешко погодени од кризата Грците купуваат бензин,
храна и облека преку границата

САНДАНСКИ - Тешко погодени од рецесијата, граѓаните на северна Грција ги трошат своите евра од другата страна на границата, во соседна Бугарија, каде што цвета бизнисот на локалните трговци и стоматолози. Напредувајќи пред останатиот дел од земјата јужниот бугарски град Сандански сега се приклучи кон еврозоната, а блискиот Петрич можеби наскоро ќе го следи неговиот пример. Изненадувачки, промените беа предизвикани од економската криза што ја погоди Грција и резултираше со сериозни зголемувања на цените на секојдневните производи во хеленската република.

Во последните неколку недели двата погранични града буквално беа под инвазија од грчки купувачи, кои навалија во кафулињата и рестораните и чекаа во редови за посета на лекар и на стоматолог. Бугарските трговци радосно ги тријат рацете: „Не можам да кажам дека сме задоволни поради економските проблеми на нашите соседи“, објаснува сопственик на една фирма, „но без нив и ние ќе пропаднеме. Последните зголемувања на цените во Грција ги трансформираа нашите два града во еден вид златен рудник за сиромашните“.

Локалните жители имаат многу да кажуваат за „напаѓачите“ со колички. Сопствениците на продавници укажуваат дека тие директно плаќаат во евра и купуваат на големо. „Тие, едноставно, не купуваат едно парче сирење „фета“ како што правиме ние, тие земаат по неколку килограми. Откако почна зголемувањето на цените, тие почнаа да купуваат тука и овошје“, забележува еден продавач во Сандански. Некои трговци изјавија дека грчките потрошувачи не се секогаш лесни за услужување. „Тие сакаат да се нагодуваат за се', и покрај тоа што успеваат само да ја намалат цената за едно евро. Но, останува фактот, дури и такви потрошувачи се подобри отколку никакви“, инсистира друг трговец.

Грците, главно, купуваат храна, облека и обувки, односно производи со најголеми разлики во цените, додека продавниците за мебел и за домашна опрема, исто така, водат добар бизнис. Не постои бавен ден во извонредниот нов шопинг-центар „Техномаркет“ или во „Е-79“ од другата страна на границата, каде што повеќето трговци дискутираат за техничките спецификац��и на јазикот на Аристотел. Грците, исто така, ги посетуваат локалните бензински пумпи. Тие доаѓаат од околните региони за да ги наполнат возилата, кои, исто така, ги товарат со канистри, бидејќи бензинот е 50 отсто поевтин. „Треба да се организираме за да се справиме со рецесијата. Понекогаш испраќаме еден возач да го наполни резервоарот и толку канистри колку што може да понесе. Потоа го делиме бензинот меѓу пријателите и соседите“, објаснува Јоргос Евтимиос, фармер од малото грчко село Виронија. Јоргос доаѓа во Сандански неколку пати неделно за да се нагодува за сирење, огревно дрво, мебел... Тој носи чифт тренерки купени во Бугарија: „Пет евра за еден чифт!“. По таа цена тој купил три чифта. Некои од неговите сонародници, повеќето пензионери, вложуваат и планираат преселување во Петрич, каде што изнајмуваат мали станови или куќи.

Развојот во бизнисот не е ограничен само во трговијата: многумина од прекуграничните купувачи ги користат поевтините и пониските цени за стоматолошки услуги. Локалните стоматолози почнаа да работат и во викендите за да се справат со приливот од Грци. Стоматологот Никола Стоилов дури постави знак на грчки јазик за работното време на неговата ординација во Петрич. „Да, имам многу грчки пациенти“, потврдува тој. „Но, тие не можат да се мамат. Ги знаат локалните цени и плаќаат исто како и Бугарите. Но, се' поголем број од нив доаѓаат во мојата ординација. Сандански и Петрич се подготвени, добродојдени се“.